8 ամսվա պատգամավորները տարածքներ են առել, ռեստորաններ են սարքում. նախկին պատգամավոր

Թե՛ տեղեկատվական, թե՛ քաղաքական այս մեծ խառնաշփոթում, վրեժխնդրության ու թշնամանքի տարրերի ակնհայտ դրսևորման այս շրջանում, իշխանությունները մեղմորեն փորձում են այնպիսի օրինագծեր ընդունել, որոնք վտանգում են մեր ինքնությունը: Այս մասին yerkir.am-ի հետ զրույցում ասաց ՀՀԿ-ական նախկին պատգամավոր Կարինե Աճեմյանը:

Մինչ իշխանությունները փորձում են հարցականի տակ դնել ազգայինն ու մնայունը, հիշեցնում է նա, ԱՄՆ-ը հայտարարություն է անում՝ ապագան ոչ թե գլոբալիստներինն է, այլ հայրենասերներինը: «Իսկ մենք, փաստորեն, «թավշյա հեղափոխությամբ» ու «ժողովրդավարությամբ» հետ ենք մնում աշխահից: Ավելին՝ ըստ իմ ունեցած տեղեկությունների՝ պատգամավորներ կան, որ զբաղված են այլընտրանքային կրթության ներմուծմամբ, որում տեղ չի գտնելու, օրինակ, Հայոց ցեղասպանությունը, սեռական դաստիարակությունն էլ տարիքային սահմանափակում չի ունենալու: Այսինքն՝ ամեն բան արվում է Ստամբուլյան կոնվենցիայի համար պարարտ հող նախապատրաստելու համար»,- նշեց Կարինե Աճեմյանը:

Yerkir.am-ի դիտարկմանը, որ այսօրվա իշխանությունները, հակադրվելով նախկիններին, ասում են, թե ՀՀԿ-ականներն են ստորագրել կոնվենցիան, արձագանքեց՝ ոչ ոք չէր պատրաստվում վավերացնել այն. միջազգային բազմաթիվ պարտավորություններ կան, որոնց շրջանակներում է ստորագրվել կոնվենցիան, իսկ ստորագրելն ու վավերացնելը տարբեր բաներ են:

«Մեր Սահմանադրության հետ մեծ հակասություններ ունի կոնվեցնիան, ու մեր խմբակցությունը չէր վավերացնելու այն: Իսկ եթե Փաշինյանն ասում է, որ մենք ստորագրել ենք, ապա իրեն ոչ ոք չի խանգարում ստորագրությունը հետ վերցնել: Բայց այսօր պատգամավորների մեծ մասը լծվել է այն վավերացնելու գործին: Հասկանում եմ՝ նրանք տարբեր շահեր ունեն, տարբեր կողմերից են ֆինանսավորվում: Անգամ լսել եմ, որ ադրբեջանական ֆոնդերից ֆինանսավորվողներ կան: Սոցիալական հարցերի ու աշխատանքի նախարարությունը գիշեօթիկ դպրոցներ է փակում, պետությունն այդ երեխաներին բախտի քմահաճույքին է հանձնում՝ խուսափելով նրանց նկատմամբ որևէ պատասխանատվություն կրելուց: Այս ամենը հաշվի առնելով է, որ ասում եմ՝ կոնվենցիան վավերացնելու հող է նախապատրաստվում»,- նշեց Աճեմյանը:

ՀՀԿ-ական նախկին պատգամավորը վստահ է՝ երկրի վարչապետը կոնկրետ թիրախներ է ընտրել, նրա քայլերը միտված են մեր ինքնությունը խաթարելուն ու, որպես հայ, մեզ ոչնչացնելուն: Շեշտում է՝ գույները չի խտացնում, ու մարդիկ ժամանակի ընթացքում տեսնելու են այնպիսի բաներ, որ այժմ չեն տեսնում կամ չեմ ուզում տեսնել:

«Ես գիտեմ պատգամավորներ, որ ընդամենը 8 ամիս է՝ մանդատ են ստացել, բայց արդեն տարածքներ են առել, ռեստորաններ են սարքում: Հարց չի՞ առաջանում՝ այս մարդիկ ինչպե՞ս այսպես արագ հարստացան: Արդարադատությունն է շատ սելեկտիվ դարձել՝ այն սկզբունքով, որ՝ ով մեզ հետ է, ամեն ինչ կարող է անել, ով մեզ հետ չէ, դավադիր է»,- ամփոփեց Կարինե Աճեմյանը: