Քաղցրաշենցիները փակել են գյուղ տանող ճանապարհը. պահանջում են բացել գյուղի մանկապարտեզը

Արարատի մարզում այսօր` հուլիսի 29-ին, լարված իրավիճակ է ստեղծվել. Քաղցրաշեն գյուղի բնակիչները, ի նշան բողոքի, փակել են Քաղցրաշեն գյուղ մտնող ճանապարհը եւ պահանջում են, որպեսզի տարածքային կառավարման նախարարությունն ու Արարատի մարզպետարանը վերջապես հստակ պատասխան տան, թե երբ է, ի վերջո, գյուղի մանկապարտեզի շահագործման հարցը լուծվելու։

Shamshyan.com-ի  հաղորդմամբ` 3 տարի է` մանկապարտեզը չի գործում, այս պահին շինարարական աշխատանքները դադարեցված են, քանի որ շինարարական կազմակերպությունը հայտնվել է ինչ-որ դատական քաշքշուկի մեջ:

Գյուղացիները, ընդառաջելով գյուղապետին եւ ոստիկանության ծառայողներին, ճանապարհը բացել են, սակայն` նշել, որ եթե մինչեւ օգոստոսի 1-ը խնդիրը չլուծվեց, այս անգամ փակելու են Երեւան-Արտաշատ մայրուղին։