Սասուն Միքայելյանը չի ընտրվել ՔՊ վարչության անդամ կառույցի ներսում եղած խմորումների պատճառով

Որ ես չընտրվեցի վարչության անդամ, քամին ցրտից չմեռավ. այսօր լրագրողների հետ զրույցում ասաց ԱԺ «Իմ քայլը» խմբակցության անդամ, ԵԿՄ նախագահ Սասուն Միքայելյանը`անդրադառնալով իր` ՔՊ վարչության անդամ չընտրվելուն: Նա միաժամանակ շեշտեց, որ իր չընտրման պատճառը վարչության ներսում խմորումներ են:

«Սասուն Միքայելյանին երբեք չի զարմացրել վարչության անդամ լինել կամ չլինելը: Բնական ա` ինչ ձայն չեն տվել, թաքցնելու բան ա՞, արդարանամ, ասեմ, չէ` ձայն տվի՞ն: Միգուցե ինչ-որ խմորումներ  են գնացել, ինչ-որ մարդիկ թիմեր են ձևավորել ներսում` որոշակի անձինք: Դրա համար այս սենց եղավ, բայց այսօր Սասուն Միքայելյանին երբեք չի խանգարի, որ իր գործը, որպես ՔՊ անդամ, շարունակի: Պլյուս դրան` Սասուն Միքայելյանի օրոք ՔՊ-ն հաղթանակ ա տարել: Սասուն Միքայելյանը եղել ա էդ կուսակցության ղեկավարը 2.5 տարի և ավելի: Ոնց որ ասում ` էսօր որ ես չընտրվեցի վարչության անդամ, քամին ցրտից չմեռավ»,- նշեց նա:

Խոսելով մանդատը վայր դնելու`լրատվամիջոցներում տարածված տեղեկությունների մասին` Միքայելյանն ասաց, որի ինքը չգիտի, թե դա ում երազանքն է, որ մանդատը վայր դնեմ: Պատգամավորի խոսքով` իրեն ընտրել է ժողովուրդը, ու ինքը պատասխանատու է նրանց առաջ։

«Մանդատն ինձ տվել է ժողովուրդը, ես երկար տարիներ ծառայել եմ էս ժողովրդին, և այս նորագույն պատմության մեջ առաջին դեպքն է երևի, որ արդար ընտրություններ է գնացել, և ես գրեթե 32 հազար ձայն եմ հավաքել։ Ես այդ ժողովրդի առաջ եմ պատասխանատու, ոչ թե ինչ-որ խաղերի կամ նրանց, ովքեր ինձ չեն ընտրել, որ ես խռովեմ, նեղանամ։ Ես խռովող տղա չեմ։ Ես իմ գործն արել եմ, անում եմ, ավելի եմ անելու»,- հայտարարեց Միքայելյանը։

Հարցին` ինչու ինքը մինչ օրս ԱԺ նիստերին չի մասնակցել, պատասխանեց, որ առողջական խնդիրներ կային: «Գումարած դրան էլ` ցանկանում էի, որ հանդարտվի իրավիճակն ու ամեն ինչ պարզ լինի»,- նշեց պատգամավորը։

Միքայելյանն այսօր նաև հերքեց այն տեղեկությունները, թե ՔՊ համագումարում իր ելույթի ժամանակ ներկաներից շատերը ցուցադրաբար լքել են դահլիճը. «Նման բան չի եղել: Գնացել են ծխելու, ես պարզել եմ»,- ասաց նա: