Զելենսկին հիասթափված է ԵԽԽՎ-ի որոշումից

Ուկրաինայի նախագահ Վլադիմիր Զելենսկիին հիասթափեցրել է ԵԽԽՎ-ի` ռուսական պատվիրակության վերադարձի մասին որոշումը. հայտնում է РИА Новости-ն:

Նա նշել է, որ անցյալ շաբաթ Ֆրանսիայի և Գերմանիայի նախագահների հետ հանդիպման ժամանակ ասել էր, որ ռուսական պատվիրակության վերադարձը ԵԽԽՎ հնարավոր է միայն այն բանից հետո, երբ ՌԴ-ն կատարի վեհաժողովի սկզբունքային պահանջները:

«Ափսոսում եմ, որ մեր  եվրոպացի գործընկները մեզ չլսեցին և այլ կերպ վարվեցին»,- գրել է Զելենսկին իր ֆեյսբուքյան էջում:

Ավելի վաղ Yerkir.am-ը տեղեկացրել է, որ ԵԽԽՎ-ն երեկ կայացած նիստում կողմ քվեարկեց կանոնակարգային կոմիտեի ղեկավար Պետրա դե Սուտերի զեկույցին, որում բանաձև է ներառված, որը թույլ է տալիս Ռուսաստանին մասնակցել հունիսյան նստաշրջանին: Կողմ է քվեարկել 118 պատգամավոր, դեմ` 62-ը, 10-ը ձեռնպահ են մնացել:

Դրանից հետո ՌԴ-ն  ԵԽԽՎ աշխատանքներին մասնակցելու հայտ է ներկայացրել:

 Հիշեցնենք, որ ռուսական պատվիրակությունը 2014-ի ապրիլին Ուկրաինայում իրադարձությունների հետ կապված զրկվել է քվեարկության իրավունքից: