Հայտնի է` ով կդառնա Վրաստանի խորհրդարանի նախագահ

Վրաստանի խորհրդարանի նախագահ Իրակլի Կոբախիձեի հրաժարականից հետո այդ պաշտոնին կհավակնի «Վրացական երազանք – դեմոկրատական Վրաստան» իշխող կուսակցության անդամ, խորհրդարանական մեծամասնության առաջնորդ  Արչիլ Թալակվաձեն. հայտնում է Sputnik Грузия-ն:

«Ես կարող եմ ասել, որ այլ թեկնածություն չի դիտարկվում, և խորհրդարանական մեծամասնությունը կաջակցի Արչիլ Թալակվաձեին»,-ասել է կուսակցության առաջնորդ Մամուկա Մդինարաձեն:

Հիշեցնենք, որ Կոբախիձեն հրաժարական է տվել` երկրում բողոքի ցույցերի ֆոնին:

Վրաստանի խորհրդարանում անցկացվող` Ուղղափառության միջխորհրդարանական վեհաժողովի ժամանակ սկանդալ է տեղի ունեցել: Վրացի  ընդդիմադիր պատգամավորներին դուր չի եկել, որ Ռուսաստանի Պետդումայի պատգամավոր Սերգեյ Գավրիլովը, որը նախագահում էր նիստը, նստել է Վրաստանի խորհրդարանի խոսնակի տեղում: Ավելի ուշ ակտիվիստները հավաքվել են խորհրդարանի շենքի մոտ և այրել ՌԴ նախագահ Վլադիմիր Պուտինի նկարը: Այնուհետև իրավիճակն ավելի է լարվել:

Գիշերը Թբիլիսիի խորհրդարանի մոտ հարյուրավոր ցուցարարներին ցրելու համար Վրաստանի ՆԳՆ-ն կիրառել է ջրցաններ, ռետինե փամփուշտներ, զրահամեքենա, հրշեջ մեքենա և լուսաձայնային նռնակներ: Նրանք պահանջում էին ՆԳՆ ղեկավարի և խորհրդարանի նախագահի հրաժարականը: