Մի տարի է` պաշտոնավարում եք, ոչ մեկիդ երեխու հաշվին մի քանի միլիոն` մի 10 միլիոն դոլարն ի՞նչ է, որ չկա. ԱԺ նախագահ

Ազգային ժողովի նախագահ Արարատ Միրզոյանն այսօր անդրադարձավ ընդդիմադիր խմբակցությունների այն խոսքերին, որոնց համաձայն` վարչապետը լավն է, բայց կադրային քաղաքականությունը՝ ոչ։ Նա սկսեց ծաղրել նմանատիպ խոսակցությունները`միևնույն ժամանակ կոչ անելով անուն առ անուն ասել՝ ովքեր են սխալ ընտրված կադրերը, այլապես իրենք չեն կարողանա շտկել վատ քաղաքականությունը։

«Ահա, խնդրեմ, Տիգրան Խաչատրյան, օրինակ, էկոնոմիկայի նախարար: Կարո՞ղ եք ասել՝ վա՞տ կադրային քաղաքականություն է։ Մի հատ նայեք էդ մարդու կենսագրությունը և ասեք։ Պրոֆեսիոնալ չի, չէ՞, պարոն Ջանջուղազյանը, հեչ պրոֆեսիոնալ չէ, հեչ», - նշեց Միրզոյանը, հետո անդրադարձավ  «հեղափոխական» նախարարներին` օրինակ բերելով Հակոբ Արշակյանին, Արայիկ Հարությունյանին, Արսեն Թորոսյանին։

Միրզոյանն անդրադարձավ նաև արդարադատության նորանշանակ նախարարին: Ըստ նրա` դեռ չնշանակված` Բադասսյանն արդեն ընդդիմախոսության է արժանացել։ ԱԺ նախագահը խոստացավ, որ Բադասյանից ավելի լավ արդարադատության նախարար չի լինելու:։

«Վատ կադրային քաղաքականություն է... Ոչ մեկը 250 անշարժ գույք չունի իր և իր հետ փոխկապակցված անձանց բանկում։ Մի տարի է` պաշտոնավարում եք, ոչ մեկիդ երեխու հաշվին մի քանի միլիոն` մի 10 միլիոն դոլարն ի՞նչ է, որ չկա»,– դիմելով կառավարության  անդամներին և իբր ծաղրելով քննադատությունները` ասաց Միրզոյանը: