ԼՀԿ-ն առաջարկել է, որ Անդրանիկ Քոչարյանը չլինի Ապրիլյան պատերազմի քննիչ հանձնաժողովի նախագահը

Այսօր ԱԺ ճեպազրույցների  ժամին ԱԺ «Լուսավոր Հայաստան» խմբակցության քարտուղար Գևորգ Գորգիսյանը, անդրադառնալով Ապրիլյան պատերազմի քննիչ հանձնաժողովի ստեղծմանը, ասաց, որ պատերազմից մինչ օրս կան հարցեր, որոնք հանրությանը հուզում են, և այս հարցերն ավելացնում են անվստահությունը բանակում տեղի ունեցող գործընթացների նկատմամբ։ 

Ըստ նրա` առկա կասկածները փարատելու համար հարկավոր է որոշակիություն, վստահության ավելացում, իսկ դրա համար պետք է փակվեն բոլոր բաց տեղերը, բոլոր հարցերն իրենց պատասխանները պիտի ստանան:

Նշենք, որ Գորգիսյանը վերոնշյալ հանձնաժողովի անդամ է:

«Մեր վերապահումը կապված էր հանձնաժողովի նախագահի հետ` ԼՀԿ-ն դեմ է եղել, որ հանձնաժողովի նախագահ լինի «Իմ քայլը» խմբակցության պատգամավոր Անդրանիկ Քոչարյանը։ Մեզ համար  կարևոր է, որ որևէ փուլում հանձնաժողովի գործունեությունը կասկած չհարուցի: Առաջարկեցինք, որ Անդրանիկ Քոչարյանի փոխարեն նրանց խմբակցությունից մեկ այլ պատգամավոր լինի հանձնաժողովի նախագահ` հաշվի առնելով պարոն Քոչարյանի կապերը, համակարգում աշխատելը և այլն, բայց մեր առաջարկը չընդունվեց»,- հայտնեց պատգամավորը: