Վարկածներով չենք առաջնորդվում. Մակունցը` ՍԴ անդամի թեկնածուի մասին

«Ասում էին»-ի տիրույթում շատ հարցեր կարող ենք քննարկել, այնպես որ` վարկածներով մենք չենք առաջնորդվում, տարբեր վարկածներ կարող են լինել. խորհրդարանական մեծամասնության ղեկավար Լիլիթ Մակունցն այսպես պատասխանեց Yerkir.am-ի դիտարկմանը, թե Վահե Գրիգորյանն «իրենց մարդն» է:

Շարունակելով` հավելեց, թե «պատգամավորների քվեարկության դրդպաատճառները նույնպես կարող են մեկնաբանությունների տեղիք տալ, իսկ այս պահին ունենք առաջադրված նոր թեկնածու, որի հետ հանդիպում կլինի, կհասկանանք»: «Թույլ տվեք նախապես կարծիք չհայտնել»,- ասաց Մակունցը:

Yerkir.am-ի մյուս հարցը վերաբերում էր օպերայի ու բալետի ազգային ակադեմիական թատրոնի շուրջ ստեղծված իրավիճակին: Հետաքրքրվեցինք` որպես նախկին նախարար` ինչպե՞ս է վերաբերվում թատրոնի շուրջ ծավալվող դեպքերին: Մակունցը նախ պատասխանեց, որ, որպես նախկին նախարար, խոստացել է էթիկայի սահմաներում մնալ ու չմեկնաբանել իր իրավահաջորդների գործողությունները, բայց հավելեց. «Ինչ վերաբերում է ստեղծված իրավիճակին, ես համոզված եմ, որ ցանկության դեպքում հնարավոր է գալ համատեղ ինչ-որ որոշումների, պետք է բաց խոսել ու քննարկել բոլոր խնդիրները»: