«Ես Արայիկ Հարությունյանի մարդը չեմ». ուսանողները թատերականի դռները չեն բացում

Թատերական ինստիտուտի նորընտիր ռեկտոր Լիլիթ Արզումանյանը, որի դեմ բողոքի ակցիա են իրականացնում ուսանողները, քիչ առաջ զրույց ունեցավ ուսանողների հետ: Ասաց, թե նախապես որոշել էր չմասնակցել ընտրություններին, բայց ԿԳՄՍ նախարարի հետ հանդիպումից հետո եկել են ընդհանուր եզրահանգման` ինքնաբացարկ չներկայացնել:

«Վստահեցնում եմ` ես Արայիկ Հարությունյանի մարդը չեմ, եթե նրա մարդը լինեի, ԲՈԿ-ի նախագահի պաշտոնից չէի ազատվի: Այն զգացողությունները որ հիմա ես ունեմ, չէի ցանկանա, որ ձեզնից որևէ մեկն այդ նույն զգացողություն ունենար»,- ասաց Արզումանյանը:

Նա նշեց` առավելագույնը, որ կարող է անել, ուսանողների հետ բարիդրացիական հարաբերություններ ապահովելն է:

Ուսանողները, սակայն, դրան էլ էին դեմ, «հրաժարական» էին վանկարկում:

Տեսնելով, որ ուսանողներն անդրդվելի են, Լիլիթ Արզումանյանն ասաց` որոշում կկայացնի, ու դա կհրապարակի վաղը: Ուսանողները համաձայնեցին ` ընդգծելով, որ այսօր ինստիտուտից չեն հեռանա:

ԱԺ պատգամավոր Լուսինե Բադալյանի հետ երկարատև բանակցություններից հետո ուսանողները որոշեցին ներս թողնել ոստիկաններից մեկին: Եկավ, զրուցեց, ինչ-ինչ խորհուրդներ տվեց ու անցավ ոստիւկանության ավանդական գործելաոճին` փորձելով ակտիվ երիտասարդներից մեկի հետ առանձին զրույց ունենալ: «Պա'պ ջան, մի րոպե առանձնանք, խոսենք»,- երիտասարդին դիմելով` ասում էր ոստիկանը, բայց նա դեմ էր: «Առանձին խոսելու բան չկա»,- նշում էին ուսանողները:

Պայմանավորվածության համաձայն` ոստիկանը ԱԺ պատգամավորի հետ զրույցելուց հետո պետք է լքեր բուհի տարածքը, բայց դա անել չէր ուզում: «Մնամ` պահպանելու, հսկելու հասարակական կարգը»,- ասում էր նա: Ուսանողները դեմ էին: Ի վերջո, Բադալյանի հետ խորհրդակցելուց հետո, նաև անսալով նրա հորդորին` ոստիկանը դուրս եկավ բուհից:

Ուսանողների ցույցը շարունակվում է: