ՀԱՊԿ գլխավոր քարտուղարի մասով մեր դիրքորոշումը չի փոխվել․ Ռուբեն Ռուբինյան

Հայկական կողմի դիրքորոշումը հայտնի է, այն չի փոխվել. ԱԺ-ում լրագրողների հետ ճեպազրույցում ասաց ԱԺ արտաքին հարաբերությունների մշտական հարցերի հանձնաժողովի նախագահ Ռուբեն Ռուբինյանը՝ անդրադառնալով ՀԱՊԿ անդամ երկրների ԱԳ նախարարների՝ մայիսի 22-ին կայանալիք խորհրդի նիստին, որտեղ պետք է որոշվի ՀԱՊԿ գլխավոր քարտուղարի նշանակման հարցը:

«Հայկական կողմն ունեցել է մի քանի սկզբունքի հետ կապված դիրքորոշում: Դրանցից գլխավորն այն է եղել, որ կա իրավիճակ, երբ գլխավոր քարտուղարը դադարել էր պաշտոնավարել: Հայտնել ենք մեր դիրքորոշումն առ այն, որ գործ ունենք չկարգավորվածության հետ, և անհրաժեշտ  է դա կարգավորել աշխատանքային կարգով, նաև, ըստ ռոտացիայի, կա ժամանակաշրջան և այդ ժամանակաշրջանում պատկանում է Հայաստանին»,- ասաց նա:

Հարցին՝ մայիսի 22-ին Հայաստանը պնդելո՞ւ է, որ իր թեկնածուն ստանձնի քարտուղարությունը, Ռուբինյանն արձագանքեց. «Հարցը պետք է հասցեագրեք գործադիրի ներկայացուցչին»:

Հիշեցնենք՝ 2018 թվականի նոյեմբերի 2-ին, հայկական կողմի նախաձեռնությամբ, ՀԱՊԿ գլխավոր քարտուղար Յուրի Խաչատուրովը հետ է կանչվել այդ պաշտոնից: Նրան մեղադրանք է առաջադրվել «Մարտի 1»-ի գործի շրջանակում: ՀԱՊԿ գլխավոր քարտուղարի նշանակման հարցը կորոշվի մայիսի 22-ին։