Կը Մերժենք Որեւէ Զիջում

Մեր լաւագոյն զաւակներուն արիւնով, զոհաբերութեամբ ու նուիրումով ստեղծուած Արցախի անկախ պետականութեան հանդէպ Հայ Յեղափոխական Դաշնակցութիւնը չի կրնար ընդունիլ, հանդուրժել զիջումի նուազագոյն իսկ տրամադրութիւն:

Դաշնակցութիւնը իր ազգային էութեան դաւաճանած կ՛ըլլայ, եթէ չմերժէ պարտուողական ու զիջողական տրամադրութիւնները, ինչ ձեւով ու ինչ մակարդակով ալ արտայայտուին անոնք:

Իշխանական օղակներէ դուրս եկած Արցախի ինքնորշման իրաւունքի պաշտպանութեան հանդէպ վճռականութեան պակասն իսկ, եթէ եւ երբ նման դիրքորոշում դրսեւորուի, մենք կը նկատենք դաւաճանութիւն:

Արցախի հարցով ամէնէն վտանգաւոր սպառնալիքը կը նկատենք եւ իբրեւ այդպիսին՝ խստօրէն կը դատապարտենք Հայաստանի ժողովուրդին մօտ Արցախի պաշտպանութեան հանդէպ նուազագոյն տատամսում սերմանող ուղղակի կամ անուղղակի քարոզչութիւն: Հայաստանի եւ Ատրպէյճանի ժողովուրդները խաղաղութեան պատրաստելու քօղին տակ յայտարարութիւններն ու սպասուող գործողութիւնները մեր համազգային ամրութիւնը քայքայել փորձող դաւադրութիւն կը նկատենք:

Կ՛ողջունենք Հայոց բանակը ուժեղացնելու պետական քայլերը ու ամբողջականօրէն թիկունք կը կանգնինք անոնց:

Մեր ամբողջ հնարաւորութիւններով կը սատարենք Արցախի անկախութեան միջազգային ճանաչում ապահովելու քաղաքական, դիւանագիտական աշխատանքներուն:

Իբրեւ կուսակցութիւն՝ անցեալին քննադատուած ենք, որ մեր ուշադրութեան կեդրոնը եղած է Արցախը: Չի բացառուիր նաեւ, որ յետագային նոյն քննադատութեան արժանանք: Մենք ճիշդ չենք գտներ այդ քննադատութիւնը: Մեզի համար, Արցախի իսկ սիրոյն՝ ուժեղ եւ բարգաւաճ Հայաստանը նախապայման է: Հետեւաբար, մենք լարուած պիտի աշխատինք մեր երկրի ժողովրդավարական կարգերու ընձեռած ամբողջ կարելիութիւններով, պիտի պայքարինք, ստեղծենք արարենք, գործակցինք, ընդդիմանանք՝ միշտ յանուն հզօր Հայաստանի կերտման:

Մեր հաւատարմութիւնը Արցախին, Հայաստանին, հայ ժողովուրդին, Հայ Դատին՝ անքննելի է. մեր պատրաստակամութիւնը ծառայելու՝ ամբողջական:

Շնորհաւոր Շուշիի ազատագրութեան տօնը: Թո՛ղ այս նշանակալի տարեդարձը մեր ժողովուրդի ազգային իղձերու իրականացման ճանապարհին որակական թռիչքներու անկիւնադարձ ըլլայ, թո՛ղ մեր հոգիները լիցքաւորուին յոյսով եւ հաւատքով՝ հայոց փայլուն ապագային հանդէպ:

«ԱՍՊԱՐԷԶ»