Քաղաքական խորհրդակցություններ են կայացել Հայաստանի և Իսպանիայի արտաքին քաղաքական գերատեսչությունների միջև

Մայիսի 7-ին Երևանում տեղի ունեցան քաղաքական խորհրդակցություններ Հայաստանի Հանրապետության արտաքին գործերի և Իսպանիայի Թագավորության արտաքին գործերի, Եվրոպական Միության և համագործակցության նախարարությունների միջև: Հայկական պատվիրակությունը գլխավորում էր ԱԳ նախարարի տեղակալ Ավետ Ադոնցը, իսպանականը՝ Իսպանիայի Թագավորության արտաքին գործերի պետքարտուղար Ֆերնանդո Վալենսուելան (Fernando Valenzuela):

Խորհրդակցությունների ընթացքում զրուցակիցները քննարկեցին հայ-իսպանական երկկողմ քաղաքական օրակարգի հարցերի լայն շրջանակ, մտքեր փոխանակեցին առևտրատնտեսական, գիտակրթական և այլ ոլորտներում համագործակցության հետագա խորացման հեռանկարների վերաբերյալ:

Անդրադառնալով ՀՀ-ԵՄ համագործակցության ներկա փուլին և զարգացման հեռանկարներին՝ հայկական կողմը ներկայացրեց ՀՀ կառավարության կողմից կազմված Համապարփակ և ընդլայնված գործընկերության համաձայնագրի կիրարկման գործընթացը և կարևորեց Իսպանիայի կողմից համաձայնագրի շուտափույթ վավերացումը:

Կողմերը քննարկեցին նաև ԵՄ մուտքի արտոնագրերի ազատականացման շուրջ երկխոսության մեկնարկը, ինչպես նաև՝ այդ գործընթացում ԵՄ անդամ երկրների աջակցությունը:

Հանդիպման ընթացքում մտքեր փոխանակվեցին երկուստեք հետաքրքրություն ներկայացնող տարածաշրջանային և միջազգային օրակարգի մի շարք հարցերի շուրջ: Կարևորվեց նաև բազմակողմ ձևաչափով միջազգային կառույցներում երկու բարեկամ երկրների միջև փոխգործակցությունը:

Իսպանական պատվիրակությանն ընդունեց նաև ՀՀ ԱԳ նախարար Զոհրաբ Մնացականյանը, ով հյուրերի խնդրանքով ներկայացրեց ղարաբաղյան հակամարտության խաղաղ կարգավորմանը միտված ջանքերը և բանակցային գործընթացի շուրջ վերջին զարգացումները:

Անդրադարձ կատարվեց նաև ԵՄ շրջանակներում Իսպանիայի հետ համագործակցությանը: