ԱԱԾ, ՊՎԾ պետերը, ոստիկանապետը ստանալու են ավելի քիչ աշխատավարձ, քան քաղաքապետարանի աշխատակազմի քարտուղարը. Խաժակյանը՝ Երևանի բյուջեի մսխման մասին

«Երբ քաղաքապետարանից ասում էին, որ օպտիմալացման արդյունքում կարող է հաստիքացուցակն ավելանալ, մտածում էի, որ բառախաղ կա, քանի որ գիտեմ, որ մեծ քանակությամբ հաստիքներ կան, որոնք պարզապես անարդյունավետ է քաղաքում ունենալը։ Հիմա փոփոխություն է տեղի ունեցել, և այդ հաստիքացուցակների թիվն էլ ավելի է մեծացվել»,- ասաց նա։

Ինչ վերաբերում է Երևանի քաղաքապետարանի աշխատակիցների աշխատավարձերի բարձրացմանը, «Լույս» խմբակցության ղեկավարը նշեց. «Երբ վերլուծում եմ, թե ինչ համամասնությամբ են քաղաքապետարանի աշխատակիցների աշխատավարձերը բարձրացրել, արձանագրում եմ հետևյալը` միջին և ստորին օղակները, որոնք մասնագիտական որոշակի ունակություններ, համայնքային ծառայողի ստաժ են պահանջում, ինչ-որ ցենզ ունեն, նրանց աշխատավարձերը բարձրացել է միջինը 25-30 տոկոսով։ Բայց քաղաքապետի, տեղակալների, թաղապետերի, թաղապետերի տեղակալների, թաղապետարանների աշխատակազմի քարտուղարների աշխատավարձը կրկնպատկվել է, 100 տոկոսով աճել է»:

Ըստ Խաժակյանի՝  սրանով մեծ բևեռացում է տեղի ունենում աշխատակազմերի միջև, ինչն անթույլատրելի է։ «Քաղաքապետարանը որոշել է նոր պաշտոն ստացածների, որոնք հայեցողական հիմունքներով են զբաղեցնում այդ պաշտոնը, աշխատավարձը կրկնապատկել: Ես ուզում եմ հասկանալ՝ քաղաքապետին ինչու է պետք 7 խորհրդական, 4 օգնական։ Ես այս թվերը համեմատում եմ վարչապետի աշխատակազմի հետ, վարչապետն ունի վճարովի 5 խորհրդական: Եթե մի ժամանակ Տարոն Մարգարյանին էինք ասում, որ` այդքան օգնական ունես, այդքան խորհրդական ունես, օպտիմալացման տեղ կա... Ի դեպ, ամեն խորհրդականի հասնում է մեկ գործավար, մեկ վարորդ, մեկ մեքենա, բնականաբար, այս ամենը մի մեծ թիվ է կազմում քաղաքի համար», - մանրամասնեց Խաժակյանը։

Նա հայտնեց, որ հաստիքացուցակի փոփոխման արդյունքում Երևանի քաղաքապետի աշխատավարձը 575 հազար դրամից դարձել է 1 միլիոն 200 հազար դրամ։

«Պարզվում է, որ ԱԱԾ, ՊՎԾ պետերը, ոտիկանապետը, ՊԵԿ-ի ղեկավարը ստանալու են ավելի քիչ աշխատավարձ, քան քաղաքապետարանի աշխատակազմի քարտուղարը, երբ աշխատանքի բնույթների սարերի ու ձորերի տարբերություն կա»,- ընդգծեց Խաժակյանը: