Իսկ ի՞նչ ենք արել մենք վերջին մեկ տարվա ընթացքում քրեական աշխարհի դեմ պայքարում. փաստաբան

Փաստաբան Նորայր Նորիկյանը Facebook-ի իր էջում գրում է.

«Ժամանակին Վրաստանում կոռուպցիայի դեմ պայքարում արձանագրված հաջողությունն ինչ-որ առումով պայմանավորված էր նաև նախագահ Մ. Սահակաշվիլու վերաբերմունքով գողական աշխարհի և դրա վառ ներկայացուցիչների նկատմամբ:
Սահակաշվիլու իշխանությունն անգամ օրենսդրորեն քրեական պատասխանատվություն նախատեսեց օրենքով գողերի համար միայն այն բանի համար, որ նշված անձինք իրենց համարում էին օրենքով գողեր:
Տառացիորեն երկու ամիս առաջ ՌԴ նախագահ Վ. Պուտինը հանդես եկավ գրեթե նույն նախաձեռնությամբ՝ Ռուսաստանում նույնպես նման օրենք ընդունելու համար:
…Մինչև իշխանափոխությունն անընդհատ խոսվում էր, որ Հայաստանում ձևավորվել էր քրեաօլիգարխիկ համակարգ, որ քրեածին տարրերը ձեռք են բերել քաղաքական լծակներ և ներթափանցել անգամ օրենսդիր ու գործադիր մարմիններ և իրենց կրած արժեհամակարգով խաթարում են պետական ապարատի բնականոն ընթացքը: Եվ դա իսկապես այդպես էր:
Իսկ ի՞նչ ենք արել մենք վերջին մեկ տարվա ընթացքում քրեական աշխարհի դեմ պայքարում: 
Միայն ամենահամարձակները կարող են արձանագրել, որ այս ոլորտում մենք ունենք շոշափելի արդյունքներ:
Այդ աշխարհի ներկայացուցիչները ոչ միայն հանգիստ նստած են իրենց տեղերում, այլև շատ հանգիստ վայելում են իրենց հաճույքները՝ պահպանելով իրենց ազդեցությունը հանրային կյանքի տարբեր ոլորտներում:
Գոնե իմ համոզմամբ կոռուպցիայի դեմ իրական պայքարի ընթացքում հանցավոր աշխարհը չի կարող դուրս մնալ այդ պայքարի տեսադաշտից: 
Չէ՞ որ այդ մարդիկ պետական համակարգում գտնվող կոռուպցիոներների հետ միասին ընդգրկված են եղել տարբեր տեսակի կոռուպցիոն սխեմաների մեջ՝ ունենալով իրենց փայաբաժինը…
Ոչ մի կասկած չունեմ, որ այս համակարգի դեմ անհրաժեշտ է իրականացնել մշտական, տեսանելի, արդյունավետ ու հետևողական պայքար:
Միայն այն հանգամանքը, որ քրեակատարողական հիմնարկներում բազմաթիվ հարցեր շարունակվում են լուծվել ոչ թե ՀՀ օրենքներով, այլ այդ աշխարհի բարքերին հարիր կանոններով, խոսում է այն մասին, որ այդ համակարգը շարունակում է մնալ որպես լրջագույն մարտահրավեր հանրության համար:
Քրեակատարողական հիմնարկներից հանրություն տեղափոխվող բարքերն իրենց վնասարարությամբ չեն զիջում ծանր հանցագործություններին: 
Այդ բարքերի զոհերն ու թիրախները հիմնականում երիտասարդներն են…
Բայց ինձ ամենից շատ մտահոգում է, որ այդ արժեքները ներթափանցել են նաև զինված ուժեր: 
Մեղրիում տեղակայված զորամասում վերջերս տեղի ունեցած ամոթալի իրադարձությունները դրա վառ ապացույցն են: 
...Տղե՛րք, շատ լավ հնարավորություն է սեղծվել՝ բացառապես օրինականության վրա հիմնված պետություն կառուցելու համար: 
Եկե՛ք այս հնարավորոությունը չմսխենք և օր ու գիշեր աշխատենք՝ մեր կյանքի որակը փոխելու և մեր երազանքի Հայաստանը կառուցելու համար... »