Մարուքյանի` դահլիճի դուռը շրխկոցով փակելը մտահոգում է «Իմ քայլի» պատգամավորին

«Իմ քայլը» խմբակցության պատգամավորը Համազասպ Դանիելյանը, անդրադառնալով այսօր խորհրդարանում Մխիթար Հայրապետյան-«Լուսավոր Հայաստան» բանակռվին ու ընդդիմության` «պատգամավորների հիմնական հատվածն առանց Նիկոլ Փաշինյանի նույնիսկ 100 ձայն չէր ստանա» հայտարարությանը, ասաց, որ դրանք պնդումներ են, որոնք կարելի է հերքել ընտրություններ անցկացնելուց հետո միայն:

Նա մտահոգություն հայտնեց, որ պրոֆեսիոնալիզմից խոսում են տարրական հաշվարկներ չարած մարդիկ: «Դրանից հետո, չգիտեմ` ինչու, Մարուքյան Էդմոնը որոշեց, որ ինքն իրեն իրավունք պետք է վերապահի խառնվելու այս երկխոսությանն ու ինչ-որ արտահայտություններ անելու։ Ափսոսում եմ, որ խորհրդարանի նիստերի ժամանակը հաճախ ծախսվում է նման խոսակցությունների վրա: ԼՀԿ խմբակցության ղեկավար Էդմոն Մարուքյանն ամբիոնից մտահոգ դեմքով խոսում է բարեկրթությունից, փոխադարձ հարգանքից, բայց, միևնույն ժամանակ, դահլիճից ամեն անգամ դուրս է գալիս` դուռը շրխկացնելով, իսկ գործընկերոջն ասում ՝ դու ո՞վ ես»,- նշեց պատգամավորը: