Ադրբեջանը պատրաստ է ընդունել հայ լրագրողների. երկրի ԱԳՆ

Ադրբեջանի ԱԳՆ-ն մեկնաբանել է երեկ Հայաստանի, Ադրբեջանի, Ռուսաստանի և ԵԱՀԿ ՄԽ համանախագահների մասնակցությամբ հանդիպումից հետո ընդունված համատեղ հայտարարությունում առկա դրույթը, որի համաձայն` կողմերը պայմանավորվել են պրակտիկ աշխատանք սկսել մարդկանց միջև շփումներ հաստատելու համար, ներառյալ`  ԶԼՄ-ների ներկայացուցիչների փոխադարձ այցերը:

Minval.az-ը, Коммерсантъ-ին հղումով, հայտնում է, որ Ադրբեջանի ԱԳՆ մամուլի խոսնակ Լեյլա Աբդուլաևան հայտարարել է, որ Բաքուն պատրաստ է ընդունել իր տարածքում հայ լրագրողների: «Բաքվում միշտ տրամադրված են եղել ստեղծել պայմաններ, որոնք կնպաստեին Ադրբեջանի և Հայաստանի հասարակությունների միջև հարաբերական փոխըմբռնման մթնոլորտի ստեղծմանը և ամրապնդմանը»,- մասնավորապես ասել է նա: