Նիկոլ Փաշինյանի թիմում շուտով խմբավորումներ են առաջանալու. Արմեն Բադալյան

Քաղաքագետ Արմեն Բադալյանն ասում է` իշխանությունների կողմից օրակարգ նետվող ոչ կարևոր հարցերն ավելի կարևոր հարցերից մարդկանց ուշադրությունը շեղելու համար չեն, ու դա այն պատճառով, որ ավելի կարևոր հարցերի շուրջ իշխանություններն այս պահին չեն աշխատում, հետևաբար` դրանք թաքցնելու անհրաժեշտություն էլ չկա:

Լրագրողների հետ այսօրվա հանդիպման ժամանակ նա ասաց նաև, որ Փաշինյանի թիմում շուտով խմբավորումներ են առաջանալու, և դա բնական երևույթ է, որ կարող է լինել, օրինակ, աշխատանքային կոլեկտիվում, կուսակցության ներսում կամ էլ իշխանության մեջ`լիդերի բաղձալի պաշտոնը զբաղեցնելու համար:

«ՀՀԿ-ի դեպքում դա տեղի ունեցավ Հովիկ Աբրահամյանի և Տիգրան Սարգսյանի հակասությամբ, ՀՀՇ-ի դեպքում` Էդուարդ Եգորյան-Վազգեն Մանուկյան իրարամերժությամբ: Հիմա նույն երևույթը  լինելու է «Իմ քայլ»ում: Ամենատարբեր մարդիկ փորձելու են հնարավորության դեպքում փոխարինել առաջին դեմքին: Ինչքան վարչապետը սոսնձի դեր կատարի, ինչ-որ ժամանակ անց նրա վարկանիշն անկում է ապրելու, և այդ 88 հոգին տարբեր խմբեր են ձևավորելու»,- նշեց Բադալյանը:

Նա հավելեց, որ, ի դեպ, վերջերս նախագահ Արմեն Սարգսյանի պաշտոնավարման  մեկ տարին լրացավ, բայց այդ մասին ոչ ոք չհիշեց, իսկ դա ինչ-որ բան նշանակում է: