Ռոբերտ Քոչարյանը որևէ պատգամավորի տեսնելու ցանկություն չունի. Ալումյան

ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը մինչև հիմա նրա մոտ չի նկատել որևէ պատգամավորի տեսնելու ցանկություն: Այս մասին նա ասաց լրագրողների հետ հանդիպման ժամանակ՝ պատասխանելով հարցին, թե կա՞ պատգամավոր, որը Քոչարյանին տեսակցելու ցանկություն է հայտնել: 

«Ես չգիտեմ, թե դուք որ պատգամավորին նկատի ունեք, բայց ես հենց Ռոբերտ Քոչարյանի մոտ նման բան չեմ նկատել»,- ընդգծեց փաստաբանը:

Ինչ վերաբերում է Ռոբերտ Քոչարյանի` հարազատների հետ տեսակցությանը, Հայկ Ալումյանը նշեց՝ ապրիլի  3-ին 2,5 տարեկան թոռնիկին և նրա մորը չի թույլատրվել տեսակցել Ռոբերտ Քոչարյանին: «Ապրիլի 4-ին Հատուկ քննչական ծառայության քննիչն ասել է, որ ինքը պատրաստ է թույլատրել թոռնիկի տեսակցությունը պարոն Քոչարյանի հետ, իսկ մինչ դա թոռնիկի հետ տեսակցությունն արգելել են: Իհարկե, մինչև այսօր դեռ չի տեսակցել, քանի որ խնդիրներ կան՝ կապված, թե  ամիսը քանի անգամ կարող են տեսակցություններ լինել»,- շեշտեց նա:  

Հիշեցնենք, որ երեկ Հատուկ քննչական ծառայությունը հայտարարություն էր տարածել, որում ասվում էր. «Հաշվի առնելով Մարտի 1-ի քրեական գործով մեղադրյալ Ռոբերտ Քոչարյանի հետ նրա ընտանիքի անդամների, մասնավորապես 2,5 տարեկան թոռնիկի տեսակցության արգելքի վերաբերյալ զանգվածային լրատվամիջոցներում տարածված հակասական մեկնաբանությունները` անհրաժեշտ ենք համարում պարզաբանել հետևյալը.

Հատուկ քննչական ծառայությունից հայտնում են, որ մարտի 1-ի քրեական գործի նախաքննության շահերից ելնելով` 28.07.2018թ.-ին որոշում է կայացվել արգելել Ռոբերտ Քոչարյանի տեսակցությունն ու հեռախոսազանգերը մերձավոր ազգականների, զանգվածային լրատվության միջոցների  ներկայացուցիչների և այլ անձանց հետ, ինչպես նաև կապն ընտանիքի ու արտաքին աշխարհի  հետ:

2019թ. ապրիլի 4-ին պաշտպան Հովհաննես Խուդոյանը գրավոր միջնորդել է` թույլատրել Ռոբերտ Քոչարյանի տեսակցությունը վերջինիս 2,5 տարեկան թոռնիկի հետ: Հաջորդ օրն իսկ՝ ապրիլի 5-ին, քննչական խմբի ղեկավարի կայացրած որոշմամբ երեխային թույլատրվել է տեսակցել Ռոբերտ Քոչարյանին: Ընդ որում, հաշվի առնելով, որ ապրիլի 5-ին հաջորդող օրերը եղել են ոչ աշխատանքային, պաշտպան Հովհաննես Խուդոյանի բանավոր խնդրանքով որոշումն առձեռն հանձնվել է նրան:

Հետևաբար, 09.04.2019թ.-ին լրագրողների հետ ճեպազրույցում Ռոբերտ Քոչարյանի պաշտպան Արամ Օրբելյանի կողմից արված պնդումը, թե ներկայում արգելված է երեխայի տեսակցությունը Ռոբերտ Քոչարյանի հետ, իրականությանը չի համապատասխանում»: