Թուրքական և ղրիմյան ակումբների միջև ֆուտբոլային հանդիպումը չեղարկվել է

Թուրքական «Իսթանբուլսպոր» ակումբի և ղրիմյան «Քըզըլթաշ» ակումբի միջև Ստամբուլում մարտի 27-ին նախատեսված ֆուտբոլային հանդիպումը չեղարկվել է Ուկրաինայի բողոքների հիման վրա: Այս մասին, ըստ Sputnik-ի թուրքական ծառայության, տեղեկացրել է Անկարայում Ռուսաստանի դեսպանության ֆեյսբուքյան պաշտոնական էջը:

«Ոմանքը վախենո՞ւմ են պարտվել ղրիմցիներին: Հայտարարում են, թե աջակցում են Ղրիմի թաթարներին, սակայն հրաժարվում են ցույց տալ թուրքական հյուրընկալությունը: Ղրիմի թաթարներն ավելի լավ է արդեն չգնա՞ն Թուրքիա»,- նշված է հայտարարության մեջ:

Խաղի չեղարկման կապակցությամբ իր զայրույթն է հայտնել նաև Ղրիմի թաթարների մշակութային միությունների դաշնության և Ղրիմի զարգացման հիմնադրամի նախագահ Ունվեր Սելը: «Ֆուտբոլի ֆեդերացիան անկախ կառույց է: Ուկրաինայի դեսպանության և Թուրքիայի ԱԳՆ-ի կողմից ՈւԵՖԱ-ի ֆեդերացիաներից մեկի վրա ճնշում գործադրելը հակասում է ՈւԵՖԱ-ի և ՖԻՖԱ-ի սկզբունքներին: ՈւԵՖԱ-ի կողմից օրինական համարվող` Ղրիմի ֆուտբոլային լիգայի թիմերից մեկի հետ հանդիպման արգելումը նշանակում է, որ Թուրքիան չի ընդունում Ղրիմի թաթարների գոյությունը»,- ասել է նա: