Անձեռնմխելիության հիմքով Ռոբերտ Քոչարյանի նկատմամբ քրեական հետապնդումը դադարեցնելու վերաբերյալ բողոքի քննությունը կշարունակվի ապրիլի 11-ին

ՀՀ երկրորդ նախագահ Ռոբերտ Քոչարյանի նկատմամբ անձեռնմխելիութան հիմքով քրեական հետապնդումը դադարեցնելու վերաբերյալ պաշտպանական խմբի ներկայացրած բողոքի վերաբերյալ դատական նիստը հետաձգվել է. հայտնում է Ռոբերտ Քոչարյանի փաստաբանական թիմը:

Բացի այդ` բողոքի քննության մեկնարկին Հատուկ քննչական ծառայության քննիչ Մուշեղյանը և դատախազ Դոլմազյանը միջնորդել են բողոքի քննությունն անցկացնել դռնփակ՝ այն հիմնավորմամբ, որ Ռոբերտ Քոչարյանին առնչվող գործից մաս է անջատվել, որով նախաքննությունը դեռ շարունակվում է, իսկ հետազոտվող փաստաթղթերը գործի անջատված մասով հրապարակման ենթակա չեն։

Միջնորդությանն առարկությամբ է հանդես եկել Ռոբերտ Քոչարյանի պաշտպան Հովհաննես Խուդոյանը նշելով՝ ներկայացած բողոքի շրջանակներում նախաքննական տվյալ պարունակող փաստաթղթեր չեն հետազոտվելու: Նա նաև խնդրել է մեղադրանքի կողմի ներկայացրած միջնորդությունը մերժել:

Դատարանը՝ նախագահությամբ Գագիկ Պողոսյանի, մերժել է մեղադրանքի կողմի միջնորդությունը՝ նիստը դռնփակ անցկացնելու վերաբերյալ, բայց սահմանափակել է զլմ-ների կողմից իրականացվող տեսանկարահանումը՝ թույլատրելով ընդամենը 10 րոպե նկարահանել:

Հավելենք, որ հաջորդ դատական նիստը նշանակվել է ապրիլի 11-ին ժամը 14:30-ին: