Բարձրաստիճան պաշտոնյաներին խորհուրդ եմ տալիս կոռուպցիոն ճանապարհով ձեռք բերած գույքի դեպքում ներկայանալ իրավապահ մարմիններ. Փաշինյան

Չենք կարող ասել, որ բոլոր սեփականաշնորհված հողերը հետ ենք վերադարձնելու պետությանը, կարող ենք ասել, որ բոլոր այն դեպքերում, երբ պարզվի` տեղի է ունեցել ապօրինություն, այդ հողերը կվերադարձվեն Հայաստանին: Այսպես պատասխանեց ՀՀ վարչապետ Նիկոլ Փաշինյանը նորվեգացի լրագրողի այն հարցին, թե արդյո՞ք հնարավոր է լուծում տալ այն հողատարածքների սեփականաշնորհման գործընթացներին, որոնք չեն օգտագործվում իրավական պատճառներով:

«Մենք այս ուղղությամբ ունենք կոնկրետ գործընթացներ, որովհետև, օրինակ, հիշում եմ, երբ անցյալ տարվա ամռանը այցելեցի Մեղրու անցակետ և Մեղրու ազատ տնտեսական գոտի, հենց տեղում արձանագրեցի, որ այս տնտեսական գոտին, չնայած այդպիսի ընդարձակ լուսաբանմանը և քարոզչությանը, ընդհանրապես հողատարածք չունի: Բնականաբար, դա առաջին իսկ հայացքից շատ տարօրինակ փաստ էր, և մենք սկսեցինք այդ հարցով զբաղվել: Պարզվեց`հայտնի բարձրաստիճան պաշտոնյաներ Մեղրու ազատ տնտեսական գոտու շուրջը եղած բոլոր հողերը սեփականաշնորհել են` որպես կառավարության ներկայացուցիչ իմանալով, որ այդ տարածքում ներդրումային նախագիծ է իրականացվելու, ընդ որում` ծիծաղելի գներով: Առաջին բանը, որ մենք արեցինք, ինչի համար վաղը մեզ լրջորեն կքննադատեն, լուր ուղարկեցինք` եկեք, կամավոր վերադարձրեք այդ հողերը պետությանը: Քաղաքավարի խնդրեցինք, ու մեզ մերժեցին: Այս գործարքներին ավելի մանրամասն ծանոթանալուց հետո հիմա հարուցված է քրական գործ, ու կասկած չկա, որ կապացուցվի, որ այստեղ տեղի է ունեցել չարաշահում»,- նշեց Փաշինյանը` հավելելով. «Օրինակ` Մանվել Գրիգորյանի դեմ հարուցված քրեական գործի շրջանակներում Հատուկ քննչական ծառայությունը, մինչև գործը դատարան ուղարկելը, արդեն իսկ բազմաթիվ կեղծ մրցույթների փաստեր է բացահայտել, և այդ գործերն ուղարկել է տարածքային կառավարման նախարարություն: Մեր օրենքը հնարավորություն տալիս է, որ այդպիսի աճուրդները չեղյալ համարվեն, և հողերը վերադարձվեն համայնքներին»:

Վարչապետը հավաստիացրեց, որ այդ գործընթացը շարունակական է լինելու: «Չենք կարող ասել, որ բոլոր սեփականաշնորհված հողերը հետ ենք վերադարձնելու պետությանը, կարող ենք ասել, որ բոլոր այն դեպքերում, երբ պարզվի, որ տեղի է ունեցել ապօրինություն, այդ հողերը կվերադարձվեն Հայաստանին: Այո’, մենք ունենք հողի խնդիր: Կան ներդրումային այնպիսի ծրագրեր, որոնք չեն իրականանում, քանի որ նախկին պաշտոնյան սեփականաշնորհել է հողերը: Երբ իմանում են, որ կա հետաքրքրություն, մի 10 անգամ ավելի գին են ասում` նշելով, որ «իմ հողի գինն էս ա, ուզում ես ուզի, չես ուզում` ուզի»: Մի 2 օր առաջ Ռանչպար համայնքում էի, ու մարդիկ խոսում էին ավազահանքի մասին: Պարզվեց, որ սեփականատերերը նախկին և գործող բարձրաստիճան պաշտոնյաներ են: Ես հիմա հանձնարարել եմ Վերահսկողական ծառայությանը` գնալ և ստուգել, թե այս գործարքը, որը տեղի է ունեցել, արդյո՞ք օրինական է, թե՞ ոչ: Բարձրաստիճան պաշտոնյաներին խորհուրդ եմ տալիս կոռուպցիոն ճանապարհով ձեռք բերած փող կամ գույք ունենալու դեպքում ներկայանալ իրավապահ մարմիններ ու տալ խոստովանական ցուցմունք»,- ասաց Փաշինյանը: