Արգենտինայում Հայոց ցեղասպանությանը նվիրված թանգարան է կառուցվելու. Բուենոս Այրեսի քաղաքապետարանը հաստատել է

Բուենոս Այրեսի քաղաքապետարանը հավանություն է տվել Արգենտինայի մայրաքաղաքում Հայոց ցեղասպանության թանգարանի կառուցմանը: Այս մասին հաղորդում է asbarez.com-ը` Estacao Armenia-ին հղումով:

Քաղաքապետարանն անցյալ շաբաթ հաստատել է նախագիծը, որը հնարավորություն կտա Հայոց ցեղասպանության հիշատակին նվիրված հիմնադրամին` կառուցել թանգարանը: Այն  կկոչվի «Հայոց հիշողության, պատմության և մշակույթի թանգարան»:

Տեղանքը, որտեղ նախատեսվում է կառուցել թանգարանը, գտնվում է մայրաքաղաքի Պալերմո արվարձանում` հայկական համայնքի կենտրոնին շատ մոտ։ Թանգարանին կից կստեղծվի նաև Հայոց ցեղասպանության գրադարան և արխիվ։

Թանգարանի կառուցման համար քաղաքապետարանը հիմնադրամին  30 տարի ժամանակ է հատկացրել, որը կարող է երկարաձգվել:

Կայքը հավելում է, որ Արգենտինան Հայոց ցեղասպանությունը ճանաչած առաջին երկրներից է։ 1987թ․-ին երկրի նախագահ Ռաուլ Ալֆոնսինը Օսմանյան Թուրքիայի կողմից 1915-1923թթ.իրականացված` 1,5 մլն հայերի կոտորածը ցեղասպանություն է որակել։

2007թ.- ին Արգենտինայում ապրիլի 24-ը, ի հիշատակ Հայոց ցեղասպանության, Մարդկանց միջև հանդուրժողականության և հարգանքի օր է հռչակվել։