Բուենոս Այրեսի օրենսդիրները միաձայն որոշել են ապրիլի 24-ը նշել որպես 20-րդ դարի առաջին ցեղասպանության օր

Բուենոս Այրես քաղաքի օրենսդիր մարմինն ապրիլի 4-ին միաձայն ընդունել է հայտարարություն` 2014թ. ապրիլի 24-ը` Հայոց ցեղասպանության 99-րդ տարելիցի օրը, որպես «20-րդ դարի առաջին ցեղասպանության օր» հիշատակելու վերաբերյալ. հայտնում է yerkirmedia-ն: 

Նախաձեռնության հեղինակներն են քաղաքային օրենսդիր մարմնի պատգամավորներ Ռաքել Էրերոն, Վիրխինիա Գոնսալես Գասը եւ Պաբլո Պերեյրան: Օրենսդիր մարմինը նաեւ հաստատել է պատգամավոր Պաբլո Պերեյրայի մեկ այլ նախաձեռնություն, համաձայն որի` գործադիր իշխանությունը կրթության նախարարության միջոցով պետք է անհրաժեշտ միջոցառումներ ձեռնարկի, որպեսզի 2014թ. ապրիլի 24-ին եւ հաջորդող տարիներին` այդ նույն օրը, Բուենոս Այրես քաղաքի տարբեր դպրոցներում եւ կրթական հաստատություններում «Ժողովուրդների միջեւ հանդուրժողականության եւ հարգանքի օր» խորագրով միջոցառումներ իրականացվեն: