Հայաստանը ավտորիտար չի լինի. Փաշինյանը` Euronews-ին

Euronews-ի թղթակիցը Բրյուսելում զրուցել է ՀՀ վարչապետ Նիկոլ Փաշինյանի հետ:

Լրագրողը հարցրել է արտաքին քաղաքականության մասին` Երևանը դեռ փորձո՞ւմ է հավասարակշռություն պահել Մոսկվայի և Բրյուսելի միջև: Փաշինյանը պատասխանել է. «Չեմ կարծում, որ հավասարակշռելը ճիշտ ձևակերպում է: Մեր արտաքին քաղաքականության գլխավոր նպատակն է  ամրապնդել մեր անկախությունը, պաշտպանել մեր ինքնիշխանությունը, անվտանգությունը և այլն»:

Հարցին` ԵՄ-ն հարևանության քաղաքականության շրջանակում առաջարկում է ֆինանսավորում, ի՞նչ է Հայաստանն առաջարկում ԵՄ-ին, ՀՀ վարչապետը պատասխանել է, որ  Հայաստանն ունի ԵՄ-ի հետ գործընկերության մասին համապարփակ և ընդլայնված համաձայնագիր: «Մեր կառավարությունը վճռական է այն կատարելու հարցում: Դա նշանակում է ունենալ լիովին անկախ դատական համակարգ, կոռուպցիայի դեմ պայքարի ինստիտուցիոնալ մեխանիզմ և կոռուպցիայի կանխարգելում»,- ասել է նա:

Լրագրողը հարց է ուղղել նաև տնտեսական հեղափոխության մասին` հետաքրքրվելով` արդո՞ք դա է ՀՀ կառավարության առաջնահերթությունը:

«Մեզ մոտ` Հայաստանում, կառավարման ու փոփոխությունների ավտորիտար համակարգ չէ: Ժողովրդավարական համակարգի համար կարևոր է ցանկացած գործընթացում՝ քաղաքական, տնտեսական և այլն, ներառել ավելի ու ավելի շատ մարդկանց», - նշել է Փաշինյանը:

Լրագրողի հարցին, թե, հաշվի առնելով ՀՀ վարչապետի ներկայիս վարկանիշը երկրում, հնարավո՞ր է, որ վարչապետ Փաշինյանը պարբերաբար վերընտրվի, և հայերի ներկայիս սերունդը ճանաչի միայն մեկ ազգային առաջնորդի,  Փաշինյանը պատասխանել է. «Եթե ինձ ընտրեն ազատ ու ժողովրդավարական ընտրությունների ճանապարհով, դա նորմալ է: Սակայն եթե Հայաստանում առաջ գա ավտորիտար կառավարման ու բռնապետական կարգի վտանգ, ապա դա որևէ շանս չի ունենա: Ժողովրդավարությունը բխում է մեր ժողովրդից ու մեր ազգային արժեքներից»:

Տեսանյութը` այստեղ: