Կաթոլիկ աշխարհն այսօր տոնում է Վալենտինի օրը

Այսօր` փետրվարի 14-ին, կաթոլիկները տոնում են Սուրբ Վալենտինի օրը:  Տոնը 496 թ.-ին նախաձեռնել է Հելասիուս I Հռոմի պապը: Ներկայումս Վալենտինի օրը տոնում են աշխարհի մոտ 100 երկրում, հիմնականում` արևմուտքում:։ Այն համարվում է աշխատանքային օր բոլոր երկրների համար։

Վալենտինի օրն ի սկզբանե նշվել է որպես պատարագային տոն՝ նվիրված վաղ քրիստոնեական շրջանի սրբերից մեկի՝ Սբ. Վալենտինիուսի հիշատակին։ Վերջինիս, ըստ ավանդության, դատապարտել էին մահվան զինվորներին գաղտնի պսակադրելու համար: Ավանդությունն այնուհետ ասում է, որ կալանավայրում նա բուժել է բանտապետի աղջկան, որին էլ հետագայում սիրահարվել է։ Նշվում է նաև, որ մինչև իր դատավճռի ի կատար ածումը նա հրաժեշտի նամակ է թողնում իր սիրած էակին, որի վերջում գրված է լինում «Քո Վալենտին»։ Այսօր Սբ. Վալենտինի օրն աշխարհի շատ երկրներում պաշտոնապես նշվում է որպես սիրահարների տոն։