Վրաստանի ԱԳՆ ղեկավարը ապատեղեկատվության մեջ է մեղադրել Коммерсантъ-ին

Տեղեկացրել ենք, որ Մոսկվան ու Թբիլիսին ավարտել են «Ապրանքների առևտրի մաքսային վարչարարության և մոնիթորինգի մեխանիզմների մասին» համաձայնագրի դրույթներն իրականացնելու համար անհրաժեշտ ընթացակարգերի քննարկումը: Այդ մասին հայտնել էր Коммерсантъ-ը` իր աղբյուրին հղումով:

Համաձայնագիրը ստորագրվել էր 2011-ին Ժնևում. դա այն փաստաթղթերի փաթեթի մի մասն է, որով Ռուսաստանն անդամակցել է Առևտրի համաշխարհային կազմակերպությանը:

Ռուսաստանն ԱՀԿ-ին անդամակցել է 2012-ին, սակայն Վրաստանի հետ համաձայնագիրը, որը ենթադրում է երկու երկրների միջև առևտրային 3 միջանցքի ձևավորում, որոնցից երկուսն անցնելու են Աբխազիայով և Հարավային Օսիայով, այդպես էլ չի աշխատել: Մոսկվայից և Թբիլիսիից 7 տարի է պահանջվել այն իրականացնելու համար:

Վրաստանի ԱԳՆ ղեկավար Դավիթ Զալքալիանին, սակայն, հայտարարել է, որ դա ռուսական ԶԼՄ-ների հերթական ապատեղեկատվությունն է: «Դա ռուսական ԶԼՄ-ների հերթական ապատեղեկատվությունն է, որին աջակցում են մեր ընդդիմախոսները, ընդդիմությունը և Վրաստանի նախկին նախագահը»,- նշել է նա: