Երկու հայ նախարար` Լիբանանի նոր կառավարությունում

Հանրապետութեան նախագահ զօր. Միշել Աուն, որ ամբողջ օրուան ընթացքին հետեւած էր կառավարութեան կազմութեան հոլովոյթին եւ անոր արձանագրած զարգացումներուն, երէկ երեկոյեան ժամը 5:30-ին նախագահական պալատին մէջ ընդունեց վարչապետ Հարիրին, որ նախագահ Աունին ներկայացուց կառավարութեան կազմը:

Հանդիպումին ընթացքին նախագահ Աուն Սիւննի խորհրդակցական հանդիպումը ներկայացնող նախարարի պաշտօնին համար ընտրեց Հասան Մըրատի անունը, որուն լոյսին տակ Հարիրի տեղեկատուութեան նախարար նշանակեց Ժամալ Ժարրահը:

Նշենք, որ Իթթիհատ կուսակցութեան ղեկավար, երեսփոխան Ապտել Ռահիմ Մըրատ հաստատեց, որ Սիւննի խորհրդակցական հանդիպումին մէջ առկայ տարակարծութիւններուն մասին լուրերը անճիշդ են:

Ապա նախագահական պալատ հասաւ խորհրդարանի նախագահ Նեպիհ Պըրրի, որ ներկայացուց Ամալ շարժումի եւ Հըզպալլայի նախարարներուն անունները` այսպիսով ամբողջացնելով կառավարութեան կազմը. այս մասին գրում է «Ազդակ»-ը:

Այս շրջագիծին մէջ, կառավարութեան կազմութեան նախորդող 48 ժամերու բանակցութիւններուն ընթացքին անդրադարձ կատարուեցաւ ՀՅ Դաշնակցութեան տրուած զբօսաշրջութեան նախարարութիւնը տեղեկատուութեան նախարարութեամբ փոխանակելու հաւանականութեան մասին: Սակայն ՀՅ Դաշնակցութիւնը պահեց զբօսաշրջութեան նախարարութիւնը` կտրականապէս մերժելով նախարարութիւններու որեւէ փոխանակում: Այս ուղղութեամբ ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի կապեր հաստատեց խորհրդարանի նախագահ Նեպիհ Պըրրիի, վարչապետ Հարիրիի եւ Ազգային ազատ հոսանք կուսակցութեան ղեկավար, երեսփոխան Ժըպրան Պասիլի հետ:

Միւս կողմէ, երէկ կէսօրին վարչապետ Հարիրի հեռաձայնային հաղորդակցութիւն մը ունեցած էր Լիբանանեան ուժեր կուսակցութեան ղեկավար Սամիր Ժահժահի հետ եւ անկէ խնդրած կարգ մը նախարարութիւններու փոխանակում կատարել:

Վարչապետ Հարիրի խոստում ստացած էր Ժահժահէն երեկոյեան Հզօր հանրապետութիւն պլոքի նիստին ընթացքին քննարկել իր պահանջը եւ ըստ այնմ պատասխանել անոր:

Հզօր հանրապետութիւն պլոքի նիստին նախագահելէ ետք Ժահժահ յայտնեց, որ պլոքը կը փափաքի ընդառաջել վարչապետին պահանջին եւ մշակոյթի նախարարութիւնը փոխարինել վարչական բարեկարգումի պետական նախարարութեամբ, պայմանով որ կառավարութիւնը անմիջապէս կազմուի: Ան ըսաւ, թէ Լիբանանեան ուժեր կուսակցութիւնը յանուն Լիբանանի բնաւ չի զլանար եւ ագահութիւն չի ցուցաբերեր:

Կառավարութեան կազմութեան մասին հնչած դրական արտայայտութիւնները պատճառ դարձան, որ Լիբանանի վերաբերող տոլարով բաժնետոմսերուն գինը բարձրանայ 4,3 սենթով, որ 2018 օգոստոսէն ի վեր բարձրագոյնն է:

Մինչ այս զարգացումները կ՛արձանագրուէին, Պաապտայի մէջ կայացող իշխանութեան երեք պետերուն հանդիպումը կ՛աւարտէր:

Մանրամասները` սկզբնաղբյուրում: