Փաշինյանը Մոսկվայում պատասխանել է ԵԱՏՄ-ին Հայաստանի անդամակցության մասին հարցին

Արդեն տեղեկացրել ենք, որ ՀՀ վարչապետ Նիկոլ Փաշինյանը Մոսկվայում է, որտեղ մասնակցել է ԵԱՏՄ նախագահությունը Հայաստանին անցնելուն նվիրված հանդիպմանը: Նա նաև պատասխանել է լրագրողների հարցերին:

Լրագրողներից մեկը հետաքրքրել է Փաշինյանի կարծիքը` ճի՞շտ արեց Հայաստանը, որ անդամակցեց ԵԱՏՄ-ին: Փաշինյանը պատասխանել է` այն փաստը, որ իրենք նախկինում կարծում էին, թե դա ճիշտ որոշում չէ, չի նշանակում, որ այդ սխալն ուղղելու համար պետք է ուղիղ հակառակ քայլերն անել:

«Ես միշտ բերում եմ այդ օրինակը. ԱՄՆ նախագահ Բարաք Օբաման կարծում էր, որ նախագահ Բուշը ճիշտ չի արել, երբ զորք է մտցրել Իրաք, և նա դուրս բերեց զորքերն Իրաքից, և ի՞նչ ստացվեց, մենք ստացանք «Իսլամական պետություն»-ը»,- նշել է  նա:

Նա հավելել է, որ կտրուկ շրջադարձերը դժվար թե օգտակար լինեն միջազգային գործերում, իսկ Հայաստանի քայլերն այժմ ուղղված են ԵԱՏՄ-ն ավելի արդյունավետ դարձնելուն: