Վեց-յոթ ամսվա աշխատողները չէին կարող այդքան բարձր դրույքաչափերով պարգևավճարներ ստանալ. ԼՀԿ

ԱԺ «Լուսավոր Հայաստան» խմբակցության համար անընդունել է մարզպետերին նման պարգևավճարների տրամադրումը: Այս մասին ԱԺ ճեպազրույցների ժամին հայտարարեց ԼՀԿ խմբակցության պատգամավոր Անի Սամսոնյանը` անդրադառնալով մարզպետերի` իրենք իրենց պարգևատրմանը:

«Վեց-յոթ ամսվա աշխատողները չէին կարող այդքան բարձր դրույքաչափերով պարգևավճարներ ստանալ»,- նշեց պատգամավորը:

Ըստ Սամսոնյանի` քաղաքապետարանում ևս նման պարգևատրումներ եղել են, և քաղաքապետ Հայկ Մարությանը չի ցանկացել հաշվետվություն ներկայացնել, թե որ աշխատակիցները և ինչքան են պարգևատրվել:

Խմբակցության քարտուղար Գևորգ Գորգիսյանն էլ նշեց, որ իշխող մեծամասնությունը փորձում էր արդարացնել պարգևավճարները՝ նշելով, որ աշխատավարձերը ցածր են, ուստի դրանք արդարացված են: «Մեր խմբակցությունը ժամանակին առաջարկում էր աշխատավարձերը բարձրացնել, որովհետև կոռուպցիոն ռիսկեր ստեղծող դաշտ է բացվում, երբ ղեկավարն ինքն է որոշում, թե ում պարգևավճար հատկացնի»,- ասաց նա: