Եվրոպայի հնագույն հայոց գաղութում արդեն 1000 տարի ղողանջում են հայկական եկեղեցիների զանգերը

Աղբյուրը`Asbarez

Շուրջ 1000 տարի առաջ հաստատուելով Ռումանիոյ մէջ՝ հայերը կառուցեցին եկեղեցիներ եւ դպրոցներ՝ խոր արմատներ ձգելով ռումանական հիւրընկալ հողին վրայ: 1401ին, Ալեքսանտր Պարի իշխանին հրովարտակով հաստատուեցաւ Ռումանիոյ Հայոց թեմը՝ իր հայրական հոգածութեան տակ առնելով, կրթելով ու դաստիարակելով տեղի հայութիւնը, կապելով իրենց արմատներուն եւ հաւատքին հետ: Եւ ահա շուրջ 1000 տարի մշտապէս կը ղօղանջեն բոլոր հայկական եկեղեցիներուն զանգերը: Բացառութիւն չէր նաեւ այս անգամ: Առիթը Ծննդեան եւ Աստուածյայտնութեան տօնն էր, որուն առիթով հերթական անգամ հնչեցին բոլոր եկեղեցիներու զանգերը՝ ազդարարելով Փրկիչին Ծնունդը:

Ռումանիոյ Հայոց թեմի առաջնորդ Տաթեւ եպս. Յակոբեանի տնօրինութեամբ ու օրհնութեամբ տօնական Ս. պատարագներ մատուցուեցան ու ձեռնարկներ իրականացուեցան գրեթէ բոլոր հայաշատ քաղաքներուն մէջ: 

ՊՈՒԽԱՐԵՍՏ 

Առաջնորդանիստ Սրբոց Հրեշտակապետաց Մայր եկեղեցւոյ մէջ 5 Յունուարին Ճրագալոյցի Ս. պատարագ մատուցեց թեմակալ առաջնորդ Տաթեւ եպս. Յակոբեան՝ ներկայ հաւատաւոր բազմութեան ուղղելով իր պատգամն ու աւետելով Տիրոջ Ծննդեան բարի լուրը։

6 Յունուարին թեմակալ առաջնորդին կողմէ մատուցուեցաւ Ս. պատարագ, յաւարտ որուն կատարուեցաւ Ջրօրհնէքի կարգ: Պատարագի արարողութեան կը մասնակցէին Գրիգոր քահանայ Հոլկան, Եզնիկ քահանայ Թորգոմեան, Հայկ սրկ. Ազարեան, Վահէ դպիր Յովակիմեան:

Պատարագին ներկայ էր նաեւ Ռումանիոյ խորհրդարանին մէջ ազգային փոքրամասնութիւններու ղեկավար Վարուժան Փամբուկչեան: Յաւարտ պատարագի Ռումանիոյ հայոց միութեան հոգածութեամբ Դուդեան կեդրոնին մէջ համայնքի փոքրիկներուն այցելեց Կաղանդ Պապան։

Պատարագէն ետք սրբազան հօր օրհնութեամբ ընդունելութիւն կազմակերպուած էր նաեւ առաջնորդարանին մէջ: Նոյն օրը երեկոյեան Պուխարեստի հայ համայնքի ներկայացուցիչները մասնակցեցան Ռումանիոյ Հայոց թեմի եւ Ռումանիոյ հայոց միութեան կողմէ կազմակերպուած տօնական ճաշկերոյթին ու ձեռնարկին:

ՔՈՆՍՏԱՆՑԱ 

Քոնստանցայի հայ համայնքին մէջ Ս. Ծննդեան ձեռնարկները մեկնարկեցին 4 Յունուարին: Ռումանիոյ հայոց միութեան Քոնստանցայի մասնաճիւղին կողմէ կազմակերպուեցաւ Ս. Ծննդեան նուիրուած տօնական համերգ, որուն մասնակցեցան սոփրանօ, երէցկին Արմինէ Խաչատրեան, մեցոսոփրանօ Սոնիա Հազարեան, դաշնակահար Արամ Մարիուս Նիցան:

5 Յունուարի երեկոյեան, Ճրագալոյցի Ս. պատարագ մատուցուեցաւ Քոնստանցայի Ս. Մարիամ Աստուածածին եկեղեցւոյ մէջ: Պատարագիչն էր ծուխի հոգեւոր հովիւ Օշական քհնյ. Խաչատրեան: Յաւարտ Ս. պատարագի տեղի ունեցաւ տօնական ձեռնարկ եւ հանդէս, որմէ ետք, միութեան հոգածութեամբ համայնքի երեխաներուն այցելեց Կաղանդ Պապան։

6 Յունուարին մատուցուեցաւ Ս. պատարագ, որմէ ետք կատարուեցաւ Ջրօրհնէքի արարողութիւն եւ օրհնուած ջուրը բաժնուեցաւ հաւատացեալ բազմութեան: Նոյն օրը տեղի հայ համայնքի ներկայացուցիչները մասնակցեցան Ռումանիոյ հայոց միութեան կողմէ կազմակերպուած տօնական ճաշկերոյթին ու ձեռնարկին: 

ՓԻՏԵՇՏ 

5 Յունուարին Ճրագալոյցի Ս. պատարագ մատուցուեցաւ Փիտեշտ քաղաքի Ս. Յովհաննէս Մկրտիչ եկեղեցւոյ մէջ, որմէ ետք կատարուեցաւ Ջրօրհնէքի կարգ:

Ծննդեան տօնը նշուեցաւ նաեւ Պոտոշան, Սուչաւա, Գալաց, Պրըիլա, Թուլչա, Եաշ, Ֆոկշան, Ռոման եւ Թեմի այլ քաղաքներուն մէջ:

7 Յունուարին, բոլոր եկեղեցիներուն մէջ կատարուեցաւ հոգեհանգստեան պաշտօն եւ աղօթք բարձրացուեցաւ առ Աստուած ննջեցեալներու հոգիներու խաղաղութեան ու փրկութեան համար:

Այնուհետեւ թեմի հոգեւորականաց դասը սկսաւ այցելելու հաւատաւոր զաւակներու տուները՝ տանելով Փրկչի Ծննդեան աւետիսը, օրհնելով բոլոր ընտանիքներն ու տան բարիքները՝ մաղթելով առողջ, խաղաղ ու օրհնաբեր տարի: 

ՌՈՒՄԱՆԻՈՅ ՀԱՅՈՑ ԹԵՄԻ ՄԱՄԼՈՅ ԴԻՒԱՆ