Ցավալի վթարից հետո մեքենաների տեխնիկական վերահսկողության հարցերը խստացվել են. ԳՇ պետ

Բոլոր փոփոխությունները միտված են ապահովելու դրական տեղաշարժեր զինված ուժերում: Այս մասին լրագրողների հետ զրույցում ասաց ՀՀ ԶՈՒ ԳՇ պետ Արտակ Դավթյանը՝ անդրադառնալով  Արցախի ՊԲ-ում տեղի ունեցած կադրային փոփոխություններին:

Ավտոպարկի թարմացման հետ կապված հարցին և մեքենաների անսարքության պատճառով վթարների դեպքերի հիշեցմանն ի պատասխան` նա նշեց, որ վերջին 3-4 տարվա ընթացքում զինված ուժերը համալրվել են ավելի քան 2000 նոր մեքենայով, և որ, սրան զուգընթաց, շահագործումից հանվում են «իրենց դարն ապրած» կամ անսարք մեքենաները:

«Մոտակա ժամանակներում նախատեսվում է շարունակել տվյալ գործընթացը»,-նշեց Դավթյանը:

Հակադարձմանը՝ բացառո՞ւմ է, որ այսուհետ որևէ զինծառայող կհայտնվի անսարք մեքենայի ղեկին, ՀՀ ԶՈՒ ԳՇ պետը պատասխանեց. «Տվյալ գործընթացը բացառել ոչ ոք չի կարող: Երկրորդ՝ անգամ նոր տեխնիկայի պարագայում  ճանապարհին կարող է անսարքություն առաջանալ: Մենք ամեն ինչ անում ենք, որ նման տեխնիկա չհայտնվի, հատկապես` առանձնահատուկ ուշադրություն ենք դարձնում ժամկետային զինծառայողների կողմից վարվող մեքենաներին: Դա առանձնահատուկ վերահսկողության տակ է, թեև պայմանագրայինների կողմից վարվող մեքենաները նույնպես անպայման ստուգվում են երթևեկությունից առաջ, որից հետո տալիս ենք թույլատրություն: Ցավալի դեպքը, որ ունեցանք, դրանից հետո ավելի խստացվեց տվյալ վերահսկողության հարցը»: