ՀՀ դեսպանը Լիբանանի խորհրդարանի նախագահին ներկայացրել է Հայաստանի ներքաղաքական զարգացումները

Լիբանանում ՀՀ նորանշանակ դեսպան Վահագն Աթաբեկյանը դեկտեմբերի 27-ին  հանդիպել է Լիբանանի խորհրդարանի նախագահ Նաբիհ Բըրիի հետ (Nabih Berri): 

ՀՀ ԱԳՆ լրատվության և հանրային դիվանագիտության վարչությունից տեղեկացրին, որ ընդգծելով հայ-լիբանանյան հարաբերությունների առանձնահատուկ կարևորությունն ու խորապես բարեկամական բնույթը, Լիբանանի խորհրդարանի նախագահը հաջողություններ է մաղթել ՀՀ դեսպանին իր դիվանագիտական առաքելության մեջ։

Նաբիհ Բըրիի խնդրանքով դեսպան Աթաբեկյանը հանգամանալից կերպով ներկայացրել է Հայաստանի ներքաղաքական զարգացումները, կայացած խորհրդարանական ընտրությունների ընթացքն ու արդյունքները՝ որպես երկրում տեղի ունեցած թավշյա, ոչ բռնի, ժողովրդական հեղափոխության բնականոն և տրամաբանական հանգրվան:

Լիբանանի խորհրդարանի նախագահը խոստացել է իր աջակցությունը՝ Հայաստանի Ազգային ժողովի վերջնական կազմավորումից հետո երկու երկրների միջև հաստատված միջխորհրդարանական համագործակցությանը նոր թափ և նոր որակ հաղորդելու համար։