Մինսկում հերքում են, թե Լուկաշենկոն երկրի ինքնիշխանության պահպանման թեմայով խորհրդակցություն է հրավիրել

Բելառուսի նախագահ Ալեքսանդր Լուկաշենկոն ոչ մի խորհրդակցություն չի հրավիրել Ռուսաստանի ճնշումից երկիրը պաշտպանելու կամ երկրի ինքնիշխանության պահպանման թեմաներով: Այս մասին «ՌԻԱ Նովոստի»-ին հաղորդել է Լուկաշենկոյի մամուլի խոսնակ Նատալյա Էյսմոնտը:

«Մենք մեր երկրի ինքնիշխանության թեմայով արդեն կողմնորոշվել ենք, այդ հարցը չի քննարկվում: Այդ թեմայով որևէ քննարկում, խորհրդակցություն չի եղել, այդ լուրերը ինչ-որ մեկի վառ երևակայության արդյունքն են»,- ասել է նա:

Ավելի վաղ մի քանի լրատվամիջոցներ հաղորդել են, թե Լուկաշենկոն փակ խորհրդակցություն է անցկացրել երկրի առանցքային պաշտոնյաների հետ, քննարկելու ռուսական կողմից եկող ճնշումները և ինքնիշխանության պահպանման հարցը: