Օֆշորային ընկերությունը հանցագործություն չէ, դա բիզնես գործիք է. Արթուր Վանեցյանը՝ բարեկամների բիզնեսի մասին

Այսօր լրագրողները ԱԱԾ տնօրեն Արթուր Վանեցյանից փորձեցին պարզել՝ ԱԱԾ-ն զբաղվո՞ւմ է  նրա ընտանիքի անդամների օֆշորային ընկերություններով. նրա հորեղբոր կինը, որը 79 տարեկան է, օֆշորային ընկերություն ունի, նախկին իշխանության տարիներին 335 հազար դոլար տուգանվել է ԱՄՆ-ի կողմից անօրինական գործարքների համար: Հարցին ի պատասխան` ԱԱԾ տնօրենը հաստատեց՝ այո, իր հորեղբոր կինը՝ Զեմֆիրա Վանեցյանը, օֆշորում գրանցված բիզնես ունի:

«Իմ հորեղբոր կինը ՀՀ-ում  չի բնակվում  1989-ից։ Ես բիզնես չունեմ, խոշոր գործարար է եղբայրս՝ Կարեն Վանեցյանը, ով նույնպես ՀՀ քաղաքացի չէր, նա  ՀՀ քաղաքացիություն ստացել է այս տարի ՀՀ-ում տեղի ունեցած հեղափոխությունից հետո։ Նա ևս բիզնես գործունեություն չի ծավալում ՀՀ-ում»,- ասաց նա՝ շեշտելով, որ իր եղբայրները  խոշոր գործարարներ են, իսկ բիզնես գործունեություն են ծավալում Ուկրաինայում, Իրաքում, Իրանում, Սերբիայում, և հետաքննող լրագրողները կարող են հետաքննել նրանց գործունեությունը։

Ըստ Վանեցյանի՝  «օֆշորային ընկերությունը հանցագործություն չէ, այլ  բիզնես գործիք, որն օգտագործվում է աշխարհի շատ գործարարների կողմից»։

Այս համատեքստում նա, սակայն պնդեց, որ «Գոլդեն փելեսը» օֆշորային ընկերության վրա էր գրանցված, և սա այն դեպքն է, որ հանցագործություն է, քանի որ գրանցել են օֆշորում, որպեսզի թաքցնեն իրական սեփականատիրոջը:

«Պարզվեց, որ սեփականատերն իր որդին է ու մայրը: Գույքի ձեռք բերման միջոցները պարզելու համար իրականացվել են համապատասխան միջոցառումներ, ու պարոն Ավետիսյանը քննության մարմնին պատրաստակամություն է հայտնել մեր կողմից հիմնավորված ապօրինի ձեռք բերված գույքը նվիրաբերել պետությանը: Դա, իհարկե, մեղմացուցիչ հանգամանք է, քննությունը վերջնական կիրականացվի: Պարոն Ավետիսյանը պետգույքի կառավարման վարչությանը դիմել է, գործը վերջում կարճվելու է, բայց չեմ կարող ասել, որ հիմքով»,- նշեց Վանեցյանը՝ հավելելով, որ ինքը կողմնակից է, որ մարդը պետությանը փոխհատուցի հասցրած վնասները և ազատվի պատժից:

Իսկ թե նույն տրամաբանությունը  գործելո՞ւ է Ալեքսանդր Սարգսյանի դեպքում, երբ ՀՔԾ-ում գործ է քննվում, Վանեցյանն կրկնեց. «Ես կողմնակից եմ, որ պետությանը հասցված վնասը փոխհատուցվի, վերականգնվի, ու մարդն ազատվի պատժից, եթե մարդու կյանքին վնաս չեն տվել: Այդ դեպքում արդարացնող հիմքով չեն ազատվում, տարբեր հիմքեր կան»: