Իրանցի գործարարներին թույլ չեն տվել մտնել Վրաստան

«Իրանցի ներդրողների մարտահրավերները Վրաստանում» բիզնես խորհրդաժողովը, որը ծրագրված էր  դեկտեմբերի 14-ին,  ձախողվել Է: Միջոցառման կազմակերպիչը «Վրաստանում իրանցի ներդրողների միությունն» էր. հայտնում է Грузия-Онлайн-ը:

Կազմակերպության նախագահ Մոհամադ Հալեքի համաձայն՝ խորհրդաժողովը հետաձգել են այն բանի պատճառով, որ վերջին շրջանում հաճախակի են դարձել Վրաստան Իրանի քաղաքացիների մուտքի արգելման դեպքերը:

«Իրանցի ներդրողները հատուկ դեկտեմբերի 14-ի խորհրդաժողովին էին ժամանել կոնկրետ ներդրումային ծրագրերով  ու նպատակներով: Դեկտեմբերի 11-ին նրանցից երկուսին թույլ չեն տվել մտնել Վրաստան և հետ են դարձրել: Հայտնի Է, որ  Իրանի ԱԳՆ-ն  պաշտոնապես կոչ է արել իր քաղաքացիներին` ձեռնպահ մնալ Վրաստան այցելություններից, քանի դեռ առկա թյուրիմացությունը չի պարզվել: Այս ամենը հաշվի առնելով, ըստ իմ ունեցած տեղեկության, խորհրդաժողովին ներկա չի եղել Վրաստանում Իրանի դեսպան Աբաս Թալեբ Փարին, ուստի մենք որոշում ընդունեցինք հետաձգել խորհրդաժողովը և  սպասել երկու երկրների պաշտոնական գերատեսչությունների պարզաբանմանը»,- ասել Է միության նախագահը: