Կա գաղտնալսում, կա իմ խոսակցությունը, որևէ բան չեմ արել, որ, որպես ԱԱԾ տնօրեն, ամաչեմ. Վանեցյան

Գաղտնալսման երկրորդ մասը մասամբ մոնտաժված է, այսինքն` մոնտաժված է այնքանով, որ այն մասերը, որոնք ձեռնտու չեն գաղտնալսողին, մոնտաժված են. լրագրողների հետ զրույցում ասաց ԱԱԾ տնօրեն Արթուր Վանեցյանը` անդրադառնալով վերջերս հրապարակված` գաղտնալսման երկրորդ մասին:

Նրա խոսքով` եթե ԱԱԾ տնօրենը զեկուցում է վարչապետին, մանրամասնում, թե որտեղից ստացավ տեղեկատվությունը, ով իրեն զանգեց ու ինչ ասաց, դա միայն զեկուցում է: «Այստեղ շատ կարևոր հանգամանք կա` վարչապետն ասել է` ապահովիր դատարանի անկախությունը, սա է եղել նրա ասածը»,- ասաց Վանեցյանը:  

Դիտարկմանը` այդ դեպքում ինչո՞ւ եք ասում, որ հիմա դատարանը կկալանավորի, այսինքն` կանխորոշո՞ւմ եք, Վանեցյանը պատասխանեց` ոչ, ինքը չի կանխորոշում ելքը: «Ես շատ բան գիտեմ, այնքան բան գիտեմ, որ չեք պատկերացնի: Ես գիտեմ, որ ընթանում է դատական պրոցես: Կա գաղտնալսում, կա իմ խոսակցությունը, ես որևէ բան չեմ արել, որ կամաչեմ` որպես ԱԱԾ տնօրեն, չեմ արել մի բան, որի համար կամաչեմ իմ ծնողների, ընտանիքի ու հասարակության առջև: Չեմ կարծում` սարսափելի ինչ-որ բան է եղել: Ժամանակն ամեն ինչ իր տեղը կդնի»,- հավելեց ԱԱԾ տնօրենը:

Նա տեղեկացրեց նաև, որ իր հեռախոսը տվել են անկախ փորձագիտական մարմնին, և վերծանվել է ամեն ինչ: Վանեցյանի հավաստմամբ` եթե հեռախոսազրույցը գաղտնալսվում է, չի նշանակում, որ ազգային անվտանգության սպառնալիք կա: «Մերկելին էլ են լսել, Չինաստանի ղեկավարին էլ են լսել, մի մասին էլ լսել են ու չեն ասել: Ազգային անվտանգության սպառնալիք կլինի, եթե սահմանին լինեն ինչ-որ գործողություններ»,- հավելեց ԱԱԾ տնօրենը: