Կառավարությունը նիստը սկսեց մեկ րոպե լռությամբ` հարգելով երկրաշարժի զոհերի հիշատակը

Այսօր կառավարությունն արտագնա արտահերթ նիստ է գումարել Գյումրիում: Նիստը սկսվեց մեկ րոպե լռությամբ` հարգեցին 1988 թվականի երկրաշարժի զոհերի հիշատակը:

Նիստը վարում է ՀՀ վարչապետի պաշտոնակատար ՆԻկոլ Փաշինյանը: «Այսօր լրանում է 1988 թվականի Սպիտակի մեծ երկրաշարժի 30-րդ տարելիցը, որին զոհ գնացին մեր` շուրջ 25 հազար հայրենակիցներ»,- ասաց նա և առաջարկեց, մինչ նիստը սկսելը, մեկ րոպե լռությամբ հարգել զոհերի հիշատակը:

1988 թվականի դեկտեմբերի 7-ի ժամը 11:41-ին վայրկյանների ընթացքում ավերածություններ եղան Հայաստանի 21 քաղաքում և 324 գյուղում, ոչնչացան Սպիտակ քաղաքն ու հարակից գյուղերը, քանդվեց Հայաստանի երկրորդ քաղաքի` Գյումրիի շինությունների 80 տոկոսը, վնասներ կրեց Վանաձորը: