Արցախում ուսումնասիրվում է կոոպերատիվներ հիմնելու հարցը

«Աջակցություն գյուղի և գյուղատնտեսության աջակցության հիմնադրամին» ծրագրով նախատեսվում է հիմնադրամին պետական բյուջեից հատկացնել  1 միլիարդ 500 միլիոն դրամ` նախորդ տարվա 1 միլիարդ 300 միլիոն դրամի դիմաց: Ծրագիրն ուղղված է գյուղատնտեսական վարկերի տոկոսադրույքի մասնակի սուբսիդավորմանը:

 

«Խորհրդատվական և տպագրական ծառայությունների ու մոնիթորինգի կազմակերպում» ծրագրի համար ԱՀ 2019 թվականի պետական բյուջեի նախագծով նախատեսվում է  հատկացնել 18 միլիոն դրամ, նախորդ տարվա 15 միլիոն 500 հազար դրամի դիմաց:

 

«Ծրագրի շրջանակում նախատեսվում է դաշտավարության, բանջարաբուծության, պտղաբուծության, անասնաբուծության, մեղվաբուծության ոլորտներում բարձրորակ մասնագետների ներգրավմամբ անցկացնել դասընթացներ: Ագրարային արտադրության արդյունավետության և շահութաբերության բարձրացման նպատակով կմշակվեն և կիրականացվեն ուսուցողական ծրագրեր, ոլորտում նոր տեխնոլոգիաների ներդրման փորձացուցադրական միջոցառումներ, կկազմակերպվեն խորհրդատվական աշխատանքներ, կանցկացվեն սեմինարներ»,- նշել է Ժ. Միրզոյանը:

 

«Գյուղատնտեսական տեխնիկայի պետհամարանիշերի և հատուկ փաստաթղթերի պատվիրում» ծրագրի համար 2019 թվականին կհատկացվի 653 հազար 400 դրամ: Ծրագրով նախատեսվում է ձեռք բերել գյուղատնտեսական տեխնիկայի պետհամարանիշեր, տեխնիկական վկայագրեր և տեխնիկայի վարման վկայականներ:

 

«Կենտրոնացված կարգով գույքի և սարքավորումների ձեռքբերում» ծրագրով նախատեսվում է 2019 թ. ԱՀ գյուղատնտեսության նախարարության համար ձեռք բերել անհրաժեշտ գույք և սարքավորումներ 1 միլիոն դրամի չափով: 2018 թվականի համեմատ` գումարն անփոփոխ է: 

 

«Գյուղատնտեսական կենդանիների արհեստական սերմնավորում» ծրագրի համար նախատեսվում է հատկացնել 10 միլիոն 400 հազար դրամ: Ծրագրով նախատեսվում է իրականացնել 350 գլուխ խոշոր եղջերավոր կենդանիների և 100 գլուխ խոզամերունների արհեստական սերմնավորում: Ծրագրի իրականացումը հնարավորություն կտա, օգտագործելով բարձր մթերատու ցեղերի գենետիկական ներուժը, բարելավել հանրապետությունում բուծվող գյուղատնտեսական կենդանիների տոհմային հատկանիշները և բարձրացնել նրանց մթերատվությունը: Ծրագրի իրականացումը միաժամանակ հնարավորություն կտա սերմնավորվող կենդանիների մոտ կրճատել բնական զուգավորման ժամանակ փոխանցվող մի շարք վարակիչ հիվանդությունների տարածումը:

Ներկայացվող ծրագրերից զատ, գյուղատնտեսության նախարարն անդրադարձել է նաև նորերին՝ ընդգծելով, որ հունվարին հանդես են գալու նոր նախաձեռնությամբ, ըստ որի սահմանվելու են կոոպերատիվներին աջակցություն ցուցաբերելու առանձնահատկությունները:

 

«Ոլորտն ուսումնասիրվում է, և դիտարկվում են բոլոր հանգամանքները գալիք տարում կոոպերատիվներ ստեղծելու համար: Արդեն ունենք 3 հայտատուներ, ովքեր գործընթացին ներգրավվելու պատրաստակամություն են հայտնել և որոշակի աջակցություն են ակնկալում»,- նշել է Ժ. Միրզոյանը: