Նախընտրական պաստառները 2 օր շուտ տեղադրելու մեջ օրենքի խախտում չկա. Մարուքյան

«Լուսավոր Հայաստան»  կուսակցության նախագահ Էդմոն Մարուքյանն Ընտրական օրենսգրքի խախտում չի տեսնում այն բանում, որ իրենց նախընտրական պաստառները քարոզարշավի մեկնարկից երկու օր առաջ են Երևանի փողոցների համապատասխան վայրերում տեղադրվել: Ըստ նրա՝ արտահերթ պայմաններ են, երկրորդ՝ բոլոր ուժերն այսօր կարող են դրան գնալ, քանի որ այսօր հավասար հնարավորություններ կան, ինչը նախկինում չկար:

«Մենք ժամանակին քննադատում էինք, որովհետև կախվել էր Կարեն Կարապետյանի նկարը, որը թեկնածու չէր, բայց դա արել էին՝ օգտվելու նրա ռեյտինգից: Այն ժամանակ միայն ՀՀԿ-ն կարող էր շուտ տեղադրել նախընտրական վահանակները: Այսօր բոլոր ուժերը կարող են դա անել, ով շուտ պատվիրել է: Մենք այս մասին նախապես զգուշացրել ենք՝ քանի որ դիմացը հանգստյան օրեր են, օր ենք կորցնելու՝ նոյեմբերի 26-ից նոր սկսելու են տեղադրել, բայց մենք գումարը 12 օրվա համար ենք փոխանցելու: Այստեղ սարսափելի բան չկա»,- ասաց Մարուքյանը:

Հարցին, որ միջազգային դիտորդները կարող են դա խախտում համարել, նա կրկին պատասխանեց՝ Ընտրական օրենսգրքի խախտում չկա: «Երկրորդ՝ թող սա լինի ամենամեծ «խախտումը», որ ԵԱՀԿ դիտորդները կարձանագրեն, ոչ թե ընտրակաշառքի բաժանման, ընտրողների վրա ճնշման գործադրման հետ կապված»,- ասաց Մարուքյանը: