ԵՄ-ն Ադրբեջանին չի հրավիրել «Արևելյան գործընկերության» միջոցառմանը, իսկ Հայաստանը կմասնակցի հատուկ հյուրի կարգավիճակով

Թբիլիսիում դեկտեմբերի 10-12-ը կկայանա «Արևելյան գործընկերության» քաղաքացիական հասարակության ֆորումի  ամենամյա` 10-րդ վեհաժողովը. հայտում է Haqqin.az-ը:

Ըստ կայքի` պարադոքսալ է, սակայն Թբիլիսիում կայանալիք միջոցառմանը հրավիրված չեն Ադրբեջանի կառավարության ներկայացուցիչները:

Բրյուսելում դիվանագիտական աղբյուրները Haqqin.az-ին հայտնել  են, որ ԵՄ-n հրավեր չի ուղարկել Ադրբեջանի կառավարությանը, փոխարենը որոշում է կայացվել, որ միջոցառմանը կմասնակցի Վրաստանում Ադրբեջանի դեսպանատան ներկայացուցիչը, այն էլ` դիտորդի կարգավիճակով:

Ըստ դիվանագիտական աղբյուրների` հատուկ հյուրի կարգավիճակով վեհաժողովին կմասնակցի ՀՀ վարչապետը:

Դիվանագետները  կարծիք են հայտնել, որ տեղի ունեցածը, հավանաբար, կապված է ամփոփիչ հռչակագրի հետ, որը կներկայացվի վեհաժողովի մասնակիցների դատին: Դրանում աջակցություն կլինի Վրաստանի ու Ուկրաինայի տարածքային ամբողջականությանը և կբացակայի եվրոպական հասարակության վերաբերմունքը Ադրբեջանի «տարածքային ամբողջականության» և ԼՂ հակամարտության հետևանքների նկատմամբ:

Կայքի համաձայն` նախորդ բոլոր ամփոփիչ փաստաթղթերում աջակցություն է հայտնվել  «Արևելյան գործընկերության» մասնակից բոլոր  պետությունների տարածքային ամբոջականությանը:

Ըստ կայքի այլ աղբյուրների` ադրբեջանական կողմը մտադիր է բացատրություն պահանջել ԵՄ-ից և Թբիլիսիից: