Գեղարքունիք այցելել եմ որպես վարչապետ. Փաշինյանը` վարչական լծակներն օգտագործելու մասին

ՀՀ վարչապետի պաշտոնակատար Նիկոլ Փաշինյանն այսօր մամուլի ասուլիսում լրագրողներին վստահեցրեց, թե Գեղարքունիքի մարզ այցելել է որպես վարչապետ, այցը քարոզչական նպատակներ չէր հետապնդում: Նրա խոսքով` «վարչապետը քաղաքական կարգավիճակ է», և ինքն էլ քաղաքական ասելիքներով է հանդես եկել քաղաքացիների հետ շփումների ընթացքում:

«Վարչական լծակի գործադրում ասելով` նկատի պետք է ունենալ այն, ինչ անում է մեկն իր վարչական ռեսուրսի բերմամբ և չի կարող անել մյուսը: Որևէ մեկը սահմանափակվա՞ծ է` Գեղարքունիքի կամ որևէ այլ մարզում մարդկանց հետ շփվելու: Չեմ կարծում, թե որևէ մեկը նման սահմանափակում ունի: Իսկ ինչ վերաբերում է իմ` մարզի ղեկավարների հետ հանդիպմանը, ապա նմանատիպ հանդիպումներ ես էլի եմ ունեցել»,- ասաց Փաշինյանը: