Ամերիկյան կողմից զենքի վերաբերյալ առաջարկ չենք ստացել. Մնացականյանը` ТАСС-ին

ՀՀ ԱԳՆ ղեկավար Զոհրաբ Մնացականյանը հարցազրույց է տվել ռուսական ТАСС-ին, որում, ի թիվս այլ հարցերի, անդրադարձել է նաև Բոլթոնի` Երևանում արած հայտարարությանը` կապված ամերիկյան զենքի հետ:

Լրագրողը հիշեցրել է, որ ՀՀ վարչապետ Նիկոլ Փաշինյանը նշել է, որ եթե շահավետ առաջարկ լինի,  հայկական կողմը կդիտարկի այդ հնարավորությունը, և հետաքրքրվել` ի՞նչ է դա` քաղաքական հայտարարությո՞ւն, թե՞ արդեն սկսվել է ամերիկյան զենք ձեռք բերելու ինչ-որ գործընթաց:

«Ոչ մի առաջակ Հայաստանը չի ստացել: Բացի դրանից` մեր երկիրը գտնվում է շատ զգայուն տարածաշրջանում, որտեղ կա չկարգավորված հակամարտություն, և խաղաղության ու կայունության, ինչպես նաև խաղաղության հաստատմանը նպաստող մթնոլորտի ձեռք բերումը շատ կարևոր հարցեր են: Սպառազինությունների մրցավազքն այդ պայմաններում ծայրահեղ վտանգավոր երևույթ է»,- պատասխանել է Մնացականյանը: