Հայի և դաշնակցականի իդեալական կերպարը. Արամ Մանուկյանին նվիրված երգ է գրվել

Այս տարի նշվում է Հայաստանի Առաջին Հանրապետության 100-ամյակը, որի հիմնադիրն է Արամ Մանուկյանը: Ի հեճուկս հնչող բազմաթիվ քննադատություններին ու տարաձայնություններին` Հանրապետության հրապարակի մոտակայքում, վերջապես, հուլիսի 17-ին կայացավ պետական,  ռազմական, դաշնակցական գործիչ Արամ Մանուկյանի արձանի բացման հանդիսավոր արարողությունը։

Արամ Մանուկյանի մասին փոքրաթիվ երգերն ավելացել են մեկով. հայրենասիրական բազմաթիվ երգերի հեղինակ Գուսան Հայկազունը երգ է գրել Արամ Մանուկյանի մասին, որը կատարել է սիրիահայ հայտնի երգիչ, դաշնակցական Սուրեն Աճեմյանի հետ համատեղ:

Նորաստեղծ երգի մասին զրուցեցինք երիտասարդ երգչի հետ:

- Ինչպե՞ս ծնունդ առավ Արամ Մանուկյանի մասին երգ գրելու գաղափարը: Ո՞վ էր հեղինակը:

- Երգ գրելու գաղափարն առաջինն ինձ մոտ հղացավ, և երբ այդ մասին հայտնեցի Գուսան Հայկազունին, նա չմերժեց: Այս երգը նվիրված է Հայաստանի Հանրապետության 100-ամյակին և այն կերտող Արամ Մանուկյանին: Ես մեծ հույսեր ունեմ, որ գալիք օրերին Արամ Մանուկյան մեծանուն հայի մասին կգրվեն բազմաթիվ այլ երգեր: Նրա գործը պետք է ճանաչեն սերունդները:

-Մի քանի բառով ինչպե՞ս կներկայացնեք Արամ Մանուկյանին:

- Հայի և դաշնակցականի իդեալական կերպար: