Սահակաշվիլին սպասում է իր թիմակցի հաղթանակին. մտադիր է վերադառնալ Վրաստան

Մինչ Վրաստանը պատրաստվում է նախագահական ընտրությունների երկրորդ փուլին, երկրի նախկին նախագահ Միխեիլ Սահակաշվիլին  սպասում է իր դաշնակցի` Գրիգոլ Վաշաձեի հաղթանակին, որը Սալոմե Զուրաբիշվիլիի մրցակիցն է, և որի հաղթանակը կարող է ապահվել Սահակաշվիլիի վերադարձը Վրաստան:

Euronews-ին հաջողվել է զրուցել Սահակաշվիլիի հետ, նա Նիդերլանդներում է:

Հարցին` եթե Վաշաձեն հաղթի,  կվերադառնա՞ Վրաստան, Սահակաշվիլին պատասխանել է, որ ցանկացած դեպքում մտադիր է վերադառնալ Վրաստան, որպեսզի դառնա քաղաքական գործընթացի մի մասը: Միևնույն ժամանակ, նրա խոսքով,  ինքը չի ցանկանում  որևէ պաշտոն ստանալ:

Հարցին` մտադիր չէ՞ առաջադրվել  նախագահի պաշտոնում, Սահակաշվիլին պատասխանել է` ոչ հիմա: «Մենք ուժեղ թեկնածու ունենք, նա մեր համախոհն է: Ես կնախընտրեի օգնել իմ թիմակիցներին նոր խորհրդարանում տեղեր ստանալու գործում»,- հավելել է նա:

Հարցին` վստա՞հ է, որ իրեն կհաջողվի մաքրել իր անունը, Սահակաշվիլին արձագանքել է, որ վստահ է: «Ներկայումս քաղաքական գործիչների և ընտրողների մեծամասնությունն աջակցում է իմ սկսած շարժմանը: Դա նշանակում է, որ նրանք չեն հավատում իմ դեմ առաջ քաշված մեղադրանքներին»,- ասել է նա: