ԱԺ-ն Նիկոլ Փաշինյանին չընտրեց վարչապետ

ԱԺ-ում վարչապետի ընտրության հարցով քվերակության ժամանակ Նիկոլ Փաշինյանը չընտրվեց վարչապետ:

ԱԺ «Ծառուկյան» խմբակցության քարտուղար Վահե Էնֆիաջյանը հայտարարեց, որ, հավատարիմ մնալով իրենց հուշագրին, «Ծառուկյան» խմբակցությունը չի մասնակցելու քվեարկությանը:

ԱԺ նախագահ Արա Բաբլոյանն էլ ասաց, որ որոշ պատգամավորներ, այդուամենայնիվ, պետք է մասնակցեն քվեարկությանը, որպեսզի ընտրությունը կայանա: «Մենք հավաքվել ենք հենց, որ քվեարկություն անենք»,- ասաց ԱԺ նախագահը:

Փաշինյանն էլ հիշեցրեց, որ իր օգտին քվեարկելը ցանկալի չէ:

ՀՀԿ խմբակցության ղեկավար Վահրամ Բաղդասարյանը հայտարարեց, որ չի մասնակցի քվեարկությանը:

ՀՅԴ խմբակցության ղեկավար Արմեն Ռուստամյանը նույնպես հայտարարեց, որ իրենց խմբակցությունը չի մասնակցի վարչապետի ընտրությանը` տարբեր կողմերից հնչող` սաբոտաժի մասին մեղադրանքներին տուրք չտալու համար:

«Ելք» խմբակցության ղեկավար Լենա Նազարյանն ասաց, որ իրենց խմբակցությունը ձեռնպահ կքվեարկի:

Հարցը դրվեց քվեարկության և չընդունվեց ձայների` 0 կողմ, 1 դեմ, 11 ձեռնպահ հարաբերակցությամբ: Նշենք, որ նիստից բացակայում էր 34 պատգամավոր:

Հիշեցնենք` որպեսզի դեկտեմբերին տեղի ունենան արտահերթ ընտրություններ, ԱԺ-ն երկու անգամ չպիտի ընտրի վարչապետ: «Ելք»-ի կողմից Նիկոլ Փաշինյանի թեկնածության առաջադրումը ֆորմալ բնույթ էր կրում, որպեսզի իրավական կողմն ապահովվի. երեկ «Ելք» խմբակցության ղեկավարը կոչ էր արել չընտրել Նիկոլ Փաշինյանին: