Շուտափույթ ԱԺ ընտրություններ անցկացնելուն ՀՀԿ-ն դեմ է. ժամանակ է պետք նախապատրաստվելու համար

Այսօր երեկոյան սրճարանում ՀՀ վարչապետ Նիկոլ Փաշինյանի ու ՀՀԿ խմբակցության ղեկավար Վահրամ Բաղդասարյանի միջև հանդիպումից հետո, ՀՀԿ խմբակցության ղեկավարը լրագրողների հետ զույցում ներկայացրեց մանրամասներ արտահերթ խորհրդարանական ընտրությունների անցկացման քննարկումների վերաբերյալ: Նրա խոսքով` դեռ վաղ է որևէ կոնկրետ բան ասել, քանի որ վարչապետը պետք է քննարկումներ անցկացնի նաև այլ քաղաքական ուժերի հետ, իսկ քննարկումները լինելու են շարունակական: Հարցին, թե ո՞րն է ՀՀԿ-ի դիրքորոշումը, և ի՞նչ ճանապարհով է գնալու ՀՀԿ-ն, Վահրամ Բաղդասարյանը պատասխանեց. «ՀՀԿ-ն գնալու է սահմանադրական ճանապարհով: Մենք պետք է ունենանք այնպիսի խորհրդարան, որտեղ լինի իրական ընդդիմություն, իսկ դրա համար ժամանակ է պետք, որ քաղաքական ուժերը նախապատրաստվելու նարավորություն ունենան: ԱԺ ընտրությունները շուտափույթ կազմակերպելու դեպքում քաղաքական ուժերը հնարավորություն չեն ունենա նախապատրաստվել: Մենք պետք է կյանքի կոչենք ԸՕ փոփոխությունները, որից հետո միայն քաղաքական ուժերը կարող են նախապատրաստվել նոր ընտրություններին»:

Վահրամ Բաղդասարյանը ճիշտ չի համարում նոյեմբերին ԱԺ ընտրությունների անցկացումը, քանի որ պնդում է` քաղաքական ուժերը պետք է ժամանակ ունենան նախապատրաստվելու: Իսկ թե որոնք են լինելու ՀՀԿ-ի հաջորդ քայլերը, Բաղդասարյանը պատասխանեց. «Պատրաստվել ընտրություններին»:

«Ոգևորության արդյունքում չեն ձևավորում խորհրդարան, պետք է ժամանակ: Մենք կշարունակենք բանակցել»,- ասաց Բաղդասարյանը: