Արմավիրում տղամարդը ծեծի է ենթարկել կնոջն ու 1-ամյա որդուն. երեխան մահացել է

Այսօր  սպանություն է տեղի ունեցել Արմավիրի մարզում։ Ժամը 01։00-ի սահմաններում «Արմավիր» բժշկական կենտրոնից ոստիկանության Արմավիրի բաժին հայտնել են, որ իրենց մոտ է տեղափոխվել երեխայի դի։

Shamsyan.com-ի հաղորդմամբ` ոստիկանությունը պարզել է, որ նախորդ օրը` ժամը 21։00-ի սահմաններում, Արմավիրի մարզի հանդամասերից մեկում Գյումրի քաղաքի բնակիչ՝ 32-ամյա Ռուստամ Մանուկյանը ծեծի է ենթարկել իր կնոջը՝ Վանաձոր քաղաքի բնակիչ` 30-ամյա Օվսաննա Գրիգորյանին և 1 տարեկան որդուն՝ Արման Գրիգորյանին։

Ֆոտոլրագրողի տեղեկություններով՝ հիվանդանոց տեղափոխելու ճանապարհին երեխան մահացել է։ Փաստի առթիվ հարուցվել է քրեական գործ: Ձեռնարկվում են անհրաժեշտ օպերատիվ-հետախուզական և քննչական համատեղ գործողություններ Ռ. Մանուկյանին հայտնաբերելու ուղղությամբ։