Վարչապետը եւ ուժայինները հրաժարվում են ներկայացնել «ռեյդի, ասֆալտին փռելու» օպերացիայի արդյունքները

Երեկ երեկոյան Դավթաշենում տեղի ունեցած նախընտրական հանրահավաքի ժամանակ վարչապետ Նիկոլ Փաշինյանը ԱԱԾ-ին և ոստիկանությանը հրահանգեց երկու ժամվա ընթացքում իրականացնել ռեյդեր՝ բարձրաստիճան պաշտոնյաների թիկնազորներին պառկեցնել ասֆալտին։ Վարչապետը հրահանգնեց Վալերի Օսիպյանին և Արթուր Վանեցյանին` 2 ժամվա ընթացքում զեկուցել իրեն գործողությունների մասին:

Հրապարակային հանձնարարականից երկու ժամ անց որեւէ ուժային չցանկացավ մեկնաբանել, թե ինչ արդյունքներ կան: Այսօր ուժայինները եւ վարչապետը եւս լռում են:

Ոստիկանության եւ ԱԱԾ լրատվականներից yerkir.am-ին հայտնեցին, որ ԶԼՄ-ների համար հրապարակման ենթակա որեւէ նյութ չունեն:

Վարչապետ Նիկոլ Փաշինյանի մամուլի քարտուղար Արման Եղոյանը հաստատեց, որ վարչապետի կողմից սահմանված ժամկետում զեկույց ներկայացվել է, սակայն մանրամասներ չհայտնեց:

Ի դեպ, քիչ առաջ  լրագրողների հետ զրույցում համապատասխան հարցին հրաժարվեց պատասխանել նաեւ վարչապետը` ասելով, որ ամեն ինչ զեկուցվել է, ամեն բան կարգին է, արտաքին միջամտություն էլ այստեղ չի տեսնում: