ԱԱԾ տնօրենն ու ՀՔԾ պետը՝ իրենց հրաժարականների մասին

Որ վայրկյանին հասարակությունը կամ իմ ղեկավարությունը հրաժարականի պահանջ ներկայացնեն, ես հրաժարական կտամ. լրագրողների հետ զրույցում ասաց ԱԱԾ տնօրեն Արթուր Վանեցյանը՝ անդրադառնալով համացանցում հայտնված` իր ու ՀՔԾ պետի հեռախոսազրույցի ձայնագրությանը և իր հրաժարականի մասին հարցին: Նա նշեց, որ կառչած չէ պաշտոնից:

«Այս ձայնագրության տարածման նպատակն է մեր սկսած գործը կիսատ թողնելը: Ես իմ պաշտոնը զբաղեցնում եմ մեծ պատասխանատվությամբ և կարծում եմ՝ մեծ գործեր ունեմ անելու»,- ասաց Վանեցյանը:

Նրա խոսքով՝ իր համար հանելուկ է՝ ինչպես է արվել ձայնագրությունը: Վանեցյանը տեղեկացրեց, որ գործի առթիվ քրեական գործ է հարուցվել:

ՀՔԾ պետ Սասուն Խաչատրյանը եւս անդրադարձավ իր հրաժարականին` ասելով. «Ես հրաժարական կտամ այն դեպքում, երբ զգամ, որ դա հանրային պահանջ է»: Ըստ նրա՝ եթե հանրությունը պահանջի, բոլորն էլ կզգան դա: «Եթե հանրությունը նման պահանջ դնի, դուք էլ, մենք էլ դա կզգանք: Թեկուզ միայն այն, որ այստեղ նստած 100 հոգուց միայն դուք բարձրացրեցիք այդ հարցը, դա էլ ինչ-որ բանի մասին խոսում է»,- ասաց ՀՔԾ պետը: