Սահմանադրական փոփոխություններ պետք է արվեն կոնսենսուսով, ոչ թե մեկ կամ երկու անձի ցանկությամբ. Բաբլոյան

ՀՀ ԱԺ նախագահ Արա Բաբլոյանի կարծիքով՝ Հայաստանում սահմանադրական փոփոխությունների կարելի է գնալ միայն քաղաքական կոնսենսուսի միջոցով: Այս մասին նա հայտարարեց այսօր խորհրդարանում լրագրողների հետ զրույցում` անդրադառնալով հարցին, թե ինչպե՞ս է վերաբերվում սահմանադրական փոփոխությունների առաջարկին, ըստ որի` ԱԺ-ն ինքնալուծարվելու հնարավորություն պետք է ստանա:  

«Դեռ մենք չենք ստացել առաջարկություն, ստանալուց հետո կքննարկենք: Դա քաղաքական գործընթաց է և քննարկման, կոնսենսուսի արդյունք կարող է լինել, այսինքն՝ դա չի կարող լինել մեկ կամ երկու մարդու կամ քաղաքական գործչի ցանկություն: Դա պետք է լինի կոնսենսուսի արդյունք»,- ասաց Բաբլոյանը:

Ինչ վերաբերում է արտահերթ խորհրդարանական ընտրությունների անցկացման ժամկետին, նա ասաց, որ չի կարող հստակ ժամկետ նշել: «Ճիշտն ասած, չեմ կարող նշել հստակ ժամկետ, որովհետև, դուք գիտեք, որ մենք ԱԺ-ում ստեղծել ենք համապատասխան աշխատանքային խումբ, որն աշխատում է օրենսդրության փոփոխությունների վրա: Այս աշխատանքները դեռ չեն ավարտվել»,- ասաց ԱԺ նախագահը: